Alkaluman tattalin arzikin Sin na watanni biyar na farkon shekarar bana, sun nuna gagarumin ci gaba, a manyan ma’aunan tattalin arziki, kamar masana’antu da cinikayyar kasashen waje.
Tattalin arzikinta ya bunkasa lami lafiya, tare da ci gaba da inganta tsarin, wanda ya nuna manyan alamomi guda uku, wato kwanciyar hankali, da kirkire-kirkire da kuma juriya.Wannan ya faru ne saboda a bangare daya, yadda jerin manufofin da gwamnatin Sin ta kaddamar don habaka tattalin arzikin kasar suka yi kyakkyawan tasiri, da kuma a daya bangaren, yadda tattalin arzikin Sin shi kansa ya samu tushe mai karfi, da juriya, da kuma isasshiyar damar samun ci gaba, wadanda suke sa kaimi ga ci gaba mai inganci da karuwa mai ma’ana a fannin tattalin arzikin.
Wadannan alkaluma masu ban mamaki, sun ba da gudummawa mai kyau ga ci gaban tattalin arziki, da ciniki na duniya, da kuma daidaiton tsarin samar da kayayyaki na kasa da kasa, sun kuma aike da wata alama, cewa Sin tana tsayawa tsayin daka kan ci gaba da bude kofarta, da kuma raba fa’idodinta ga duniya.Tafiya tare da Sin, na nufin tafiya tare da dama, kuma saka hannun jari a Sin tamkar saka hannun jari ne a nan gaba. (Safiyah Ma)
