Ƙungiyar Manoma ta Nijeriya (AFAN), ta ce farashin kayan abinci na iya sauka idan aka yi girbi kuma gwamnati ta inganta tsaro tare da rage wa manoma kayayyakin noma.
Mataimakin shugaban AFAN na Jihar Legas, Mista Shakin Agbayewa, ya ce farashin kayan abinci kamar shinkafa, doya, rogo da garin rogo zai ragu idan manoma suka samu damar yin noma cikin tsaro tare da samun kayan noma a farashi mai sauƙi.
Ya bayyana cewa rashin tsaro, tsadar taki, hauhawar farashin mai da kuma tsadar kayayyakin noma ne suka jawo tashin farashin kayan abinci a yanzu.
A cewarsa, tsadar kayan noma, sufuri da tsaro daga ƙarshe suna shafar masu sayen kayan abinci.
Agbayewa, ya buƙaci gwamnatoci su tallafa wa manoma da taki mai rahusa, inganta hanyoyi, wuraren ban ruwa da rancen kuɗi mai sauƙi.
Ya kuma nemi a ƙara haɗin gwiwa da ƙungiyoyin manoma domin samo hanyoyin magance matsalolin da suka dace da kowace jiha.
Ya ce Nijeriya na da isasshiyar ƙasa da ma’aikata da za su iya wadatar da ƙasar da abinci idan aka aiwatar da manufofi masu kyau, yana mai cewa tallafa wa manoma ita ce hanya mafi dacewa wajen rage farashin kayan abinci da bunƙasa tattalin arziƙi.
Discussion about this post