Firaminsitan kasar Sin Li Qiang, ya jaddada muhimmancin kara azamar bunkasa sarrafa kayayyakin aiki na manyan fasahohi, da ingiza gina tsarin masana’antu na zamani, ta yadda za a ci gaba da shigar da sabon kuzari cikin ayyukan ci gaba mai matukar inganci.
Li, wanda memba ne a zaunannen kwamitin ofishin siyasa na kwamitin kolin JKS, ya yi kiran ne a jiya Litinin yayin da yake rangadi a birnin Dalian na lardin Liaoning dake arewa maso gabashin kasar Sin.
Ya ce ya kamata a matsa kaimi wajen gaggauta cimma manyan nasarori a muhimman fannonin fasaha, da horar da kwararru da ma’aikatan masana’antu masu hazaka, kana a ci gaba da karfafa, da fadada ikon gogayya a fannin kera jiragen ruwa, da kere-keren kayan aikin masana’antu.
Li Qiang, ya bayyana masana’antar kera jiragen ruwa ta Dalian, a matsayin mai dadadden tarihi, da tushe mai karfi na bunkasa samar da kayayyakin aiki na manyan fasahohi, yana mai kira da a kara azamar gina gungun kamfanonin kere-kere, da cibiyar kera jiragen ruwa da za ta yi fice a duniya. (Saminu Alhassan)
Discussion about this post