Gwamnan Jihar Bauchi, Bala Mohammed, ya sayi fom ɗin takarar Sanatan Bauchi ta Kudu a jam’iyyar APM domin shiga zaɓen 2027.
Gwamnan ya sayi fom ɗin ne bayan ya halarci taron kwamitin zartarwa na jam’iyyar APM da aka gudanar a Abuja ranar Alhamis.
A wata sanarwa da ya wallafa a Facebook, Bala Mohammed ya ce ya koma APM ne bayan tattaunawa da abokan siyasa da magoya bayansa, inda suka ga jam’iyyar ta dace da manufofinsu.
Ya ce APM jam’iyya ce da ke goyon bayan adalci, dimokuraɗiyya da bai wa kowa dama.
Gwamnan ya kuma bayyana cewa sauya sheƙarsa daga PDP zuwa APM ya samu goyon bayan ’yan Majalisar Tarayya da ta Jiha, kwamishinoni, shugabannin ƙananan hukumomi da sauran magoya baya a jihar.
Ya tabbatar wa shugabannin jam’iyyar cewa zai yi aiki domin ci gaban APM da samun nasara a zaɓe mai zuwa.
