A baya bayan nan daya daga muhimman batutuwa dake ci gaba da jan hankalin masharhanta, game da bunkasar alakar dake wakana tsakanin kasar Sin da kasashen Afirka, shi ne yadda Sin ta fara aiwatar da manufar nan ta kawar da daukacin harajin fito kan hajojin kasashen Afirka 53 dake da huldar diflomasiyya da ita, wadanda ake shigarwa kasar ta Sin tun daga ranar daya ga watan Mayu.
Wannan manufa an tsara ta ne da nufin baiwa kasashen na Afirka cikakkiyar dama ta samun daidaiton tattalin arziki, da cinikayya, da amfana daga manufar kara bude kofa ta Sin, wanda hakan ke shaida yadda Sin din ke kara zama abokiyar hulda mafi alfanu ga kasashen Afirka, wadda kuma ta shirya samar musu da damammakin cimma moriya.
Masu fashin baki daga sassan Afirka na cewa matakin jingine harajin da Sin ta ayyana, zai yi matukar tallafawa kasashen Afirka a fannin fitar da albarkatun noma, da nau’o’in ma’adanan kasa, da hajojin da ake sarrafawa a masana’antun nahiyar.
A gabar da duniya ke kara tsunduma cikin matsalolin kariyar cinikayya, a bangarenta, kasar Sin na kara bude kofofin damammaki, ta yadda kasashen Afirka za su ci gajiya ba tare da gindaya wani sharadi na siyasa ba. A daya hannun, yayin da Sin da kasashen Afirka ke kara yaukaka alaka, Sin na kiyaye martabar Afirka, da ikon mulkin kansu, tare da ba su damar bin turbar ci gaba da suka zaba da kansu.
Abun da muke gani yanzu haka na nufin dama ta samu ta cimma moriyar bai daya, wato wannan manufa ta samar da yanayin fadada fitar da hajojin Afirka zuwa babbar kasuwar kasar Sin, yayin da a hannu guda hakan ke samarwa masu sayayya na Sin karin zabi daga nau’o’i daban daban na hajojin Afirka.
A wannan gaba da sassan biyu ke kara hada hannu wajen gina al’umma guda mai makomar bai daya ta Sin da Afirka, tabbas janye harajin fito ga kasashen Afirka da Sin ta sanar, zai zamo wani inji da zai ingiza bunkasar tattalin arzikin kasashen Afirka, da kara shigar da sabon kuzari ga ci gaban nahiyar, da ma zurfafa hadin kai tsakanin kasashe masu tasowa na duniya baki daya. (Saminu Alhassan)
