Gwamnan jihar Yobe, Hon. Mai Mala Buni ya karyata jita-jitar shiga tawagar hadakar jam’iyyun adawa, wadda tsohon mataimakin shugaban kasa, Alh. Atiku Abubakar yake jagoranta.
Bayanin hakan ya zo ne kunshe a cikin wata sanarwar manema labaru, wadda mai magana da yawun Gwamna Buni, Mamman Mohammed, ya fitar a Damaturu ranar Asabar.
- Boko Haram Sun Kashe Mutum 12 A Wani Sabon Hari A Borno
- ‘Yansanda Sun Ƙwato Bindigogi Da Tabar Wiwi A Zamfara Bayan Artabu Da ‘Yan Bindiga
Wakilinmu a jihar Yobe ya nakalto cewa, akwai wani sakon wayar tafi-da-gidanka da ke yaduwa, inda aka yi ikirarin cewa Gwamna Buni da wasu gwamnonin APC guda huɗu sun yanke shawarar shiga jam’iyyar PDP kafin zabukan 2027.
Mai magana da yawun Gwamnan, Mamman Mohammed ya bayyana sakon a matsayin kirkirarre kuma marar tushe da makama, wanda yayi hannun riga da gaskiya, ta wane bangare a cikin wannan shaci-fadi.
Ya ce ba a taba yin makamancin wannan sakon ba, kuma mai wannan maganar bai taba zama makusancin Gwamna ba, ballantana ya iya gano ra’ayinsa ko ya iya hasashen yanayin siyasarsa.
“Gwamna Buni bai tsaya kawai dan jam’iyyar APC ba; ko kawai gwamnan APC ba. Shi ne APC gaba dayanta, saboda sanannen abu ne cewa APC ta ratsa jijiyoyin jininsa.
“Sannan gudunmawar da ya bayar wajen gina APC a matsayinsa na Sakatarenta na kasa sau biyu, kuma ya rike ragamar Shugaban kwamitin tsara taron jam’iyyar; ya bambanta shi da sauran yayan jam’iyyar, kuma ba abu bane mai yuwa ba ace ya bar jam’iyyar.” In ji shi.
Mai magana da yawun Gwamnan ya ce, marubucin sakon tare da masu daukar nauyinsa, ko shakka babu, yanayin salon siyasar Gwamna Buni ya na burgesu, sannan suna burin kasancewa irinsa, “amma kawai, wannan ya na iya zama kawa-zuci.”
