A kokarin ta na inganta harkar ilimi a fadin jihar Kaduna, Gwamnatin Jihar ta zuba sama da Naira biliyan daya wajen tallafin karatu, lamunin dalibai da sauran shirye-shiryen inganta ilimi cikin shekaru uku da suka gabata, a wani yunkuri na fadada damar samun ilimi ga matasan jihar.
Kwamishinan Yada Labarai da Al’adu na Jihar Kaduna, Malam Ahmed Maiyaki, ya bayyana hakan yayin wani taron tattaunawa da manema labarai a Kaduna, inda ya jaddada cewa ilimi na daga cikin manyan abubuwan da gwamnatin Uba Sani ta mayar da hankali a kai domin gina ingantacciyar makoma ga matasan jihar.A cewarsa, daya daga cikin manyan nasarorin gwamnatin shi ne rage kudin makaranta da kashi 50 cikin 100 a dukkan manyan makarantun gwamnatin jihar, matakin da ya saukaka wa dubban dalibai da iyayensu nauyin biyan kudaden karatu.
Maiyaki ya bayyana cewa gwamnatin jihar ta kashe Naira miliyan 493.27 wajen daukar nauyin karatun dalibai 42 a kasashen waje, musamman a muhimman fannoni kamar likitanci, injiniya, kimiyyar kwamfuta, tsaron yanar gizo da sauran bangarorin da ke da muhimmanci ga ci gaban zamani.
Haka kuma, ya ce an ware Naira miliyan 425.52 domin tallafa wa dalibai marasa karfi da ke karatu a jami’o’i da sauran manyan makarantu a fadin Nijeriya.
Yace gwamnatin ta samar da Naira miliyan 105 domin shirin lamunin karatu, yayin da aka sake fitar da Naira miliyan 27.25 don taimaka wa daliban da suka kammala karatun lauya wajen biyan kudin rajistar shiga Makarantar Koyon Aikin Lauya ta Kasa.
Da yake karin haske kan nasarorin da aka samu, Babban Sakataren Hukumar Tallafin Karatu da Lamuni ta Jihar Kaduna, Farfesa Yahaya Saleh Ibrahim, ya ce sama da dalibai 21,106 ne suka amfana da shirye-shiryen tallafin karatu a fiye da manyan makarantu 40 da suka hada da jami’o’i, polytechnics, kwalejojin ilimi da makarantun lafiya.Ya bayyana cewa Kaduna ta kafa tarihi a matsayin jiha ta farko a Najeriya da ta hada tallafin karatu da tsarin lamunin dalibai a karkashin tsari guda, abin da ya kara bude kofofin ilimi ga dubban matasa.
Discussion about this post