Gwamnan jihar Gombe, Muhammad Inuwa Yahaya kuma dan takarar gwamnan jihar Gombe na jam’iyyar APC a zaben 2023 ya samu nasarar lashe zaben gwamnan jihar da aka gudanar a ranar Asabar bayan samun nasarar lashe kuri’u masu yawa a kananan hukumomi 11 da ke jihar.
Da take sanar da sakamakon zaben a ranar Lahadi, baturiyar tattara sakamkon zaben kuma mukaddashiyar shugaban jami’ar gwamnatin tarayya da ke Gashua a jihar Yobe, Farfesa Maimuna Waziri ta shaida cewar Inuwa ya samu nasara ne da kuri’u 342,821 lamarn da ya kansa ga samun damar sake zama gwamnan jihar a karo na biyu.
Ta kara da cewa, Inuwa ya kayar da babban abokin hammayyarsa na jam’iyyar PDP, Mohammed Barde, da ya samu kuri’u 233,131 yayin da kuma dan takarar gwamna na jam’iyyar NNPP Khamisu Mailantarki, ya samu kuri’u 19, 861.
