Gwamnatin Jihar Kano ta sanar da rufe wasu makarantu masu zaman kansu guda tara (9) a faɗin jihar, biyo bayan samunsu da laifin saɓa ƙa’idojin aiki da rashin cika sharuɗɗan rajista da sabunta lasisin gudanarwa kamar yadda dokokin ilimi na jihar suka tanada.
Matakin ya biyo bayan wani aikin sintiri da tantance ingancin makarantu da Hukumar Kula da Makarantu Masu Zaman Kansu da na Sa-kai ta Jihar Kano (Kano State Private and Voluntary Institutions Board) ta gudanar tare da haɗin gwiwar Ma’aikatar Ilimi ta jihar a birnin Kano da kewayensa.
Babban Sakataren Hukumar Kula da Makarantu Masu Zaman Kansu da na Sa-kai ta Jihar Kano (KSPVIB), Kwamared Baba Abubakar Umar, shi ne ya yi jawabi a madadin gwamnatin jihar a yayin wata ganawa da manema labarai (media parley) a birnin Kano.
Bayanai sun nuna cewa an ɗauki wannan mataki ne bayan da makarantun suka gaza cika sharuɗɗan da doka ta gindaya, waɗanda suka haɗa da:
Yin aiki ba tare da cikakkiyar rajista a hukumance ba.
Rashin sabunta lasisin gudanar da makaranta duk da gargaɗin da aka sha yi musu a baya.
Gudanar da koyo da koyarwa a wuraren da ba su dace da tarbiyya da lafiyar ɗalibai ba.
Rashin isassun kayan aiki da ƙwararrun malamai da suka dace da tsarin manhajar karatu.
Hukumar ta jaddada cewa gwamnatin jihar ba za ta lamunci duk wata makaranta da ke gudanar da aiki a ɓoye ko ba bisa ƙa’ida ba, domin hakan na tauye daraja da ingancin ilimin da ake son bai wa al’umma tare da jefa makomar yara cikin ruɗani.
Haka kuma, an gargaɗi sauran masu makarantu masu zaman kansu a faɗin jihar da su hanzarta zuwa ofishin hukumar domin cika dukkan sharuɗɗan rajista da sabunta lasisansu, tare da ankarar da su cewa aikin rufe makarantu marasa inganci da ba sa bin doka zai ci gaba ba tare da sassautawa ba.
A ƙarshe, hukumar ta yi kira ga iyaye da su riƙa tantance sahihancin makarantun da suke saka ƴaƴansu kafin biyan kuɗin makaranta, domin tabbatar da cewa ɗaliban na karatu ne a wuraren da dokar gwamnatin jiha ta amince da su.
