Assalamu alaikum masu karatu, barkanmu da sake haduwa da ku a wannan mako a cikin shirin na mu mai farin jini da albarka na Adon Da Kwalliya.
A yau na kawo muku wasu hanyoyi wanda za a bi don gyaran jiki ba tare da an kashe kudi a shagon kayan kwalliya ba. Ya kamata mata su koyi dabaru da dama domin taimaka wa maigida. Idan maigida ya saba ba da kudin sayen kayan kwalliya, ranar da babu kuma sai a hakura a gwada daya daga cikin ababen da muke kawo muku na gyaran jiki.
- ‘Yansanda Sun Cafke Wadanda Suka Kulle Matashi A Kejin Kare
- ‘Mata Network’ Za Su Yi Taron Su Karo Na Shida A Kano
Idan ki tashi gyara gashi za ki iya hada ayaba da kwai sai a kwaba su sosai, sannan a shafa a gashi a jira na tsawon mintuna sha biyar zuwa talatin, sannan a wanke.
Domin gyara farce, za a iya tsoma hannu a cikin man zaitun na tsawon mintuna biyar sannan sai a cire a kullum. Farce zai yi matukar kyau sosai.
Ana amfani da zuma mai kyau domin samun fuska mai santsi da laushi. Ana shafawa a fuska a jira na tsawon mintuna goma sha biyar zuwa ashirin, sannan a wanke da ruwan dumi. A gwada wannan hadin sau daya ma a sati za a ga canji.
Domin masu yawan shafe-shafe za su iya yanka lemon tsami biyu sai su rika shafawa a inda ya yi duhu. Yin hakan a kullum na haskaka bakin da ya bayyana a wasu gabbai ko sassan fata.
Domin samun fatar jiki mai sulbi, za a iya amfani da man zaitun da gishirin rafi a kwaba sai a rika dirzawa a fatar jiki a kalla sau uku a sati.
Man kwa-kwa na matukar gyaran zubewar gashin kai, za a iya shafa man kwa-kwa a fatar kai, sannan a shafa a jikin gashin. A bari ya jima kamar na awa daya sannan a wanke.
Maza masu son man gyaran gemu, za su iya amfani da man kwa-kwa.
A samu lemon tsami sannan a zuba zuma a kai. Sannan a rika shafawa a kan kurajen fuska. Yin hakan na kashe su sosai. Man zaitun na sanya santsin fata idan an kasance ana yawaita shafa shi a koda yaushe a matsayin man fata.
