A yau Litinin, kakakin ma’aikatar cinikayya ta Sin ya sanar da cewa, har kullum Sin na adawa da yadda Amurka ke siyasantarwa, da mayar da batutuwan fasaha da na tattalin arziki makamin cimma bukatun kashin kai, tare da gallazawa kamfanonin Sin, bisa fakewa da dalilai marasa ma’ana da kakaba musu takunkumai.
Kalaman nasa na zuwa ne bayan da Amurka ta sanar da shirinta na gudanar da bincike kan wasu kamfanonin AI na Sin, da kuma kakaba takunkumai. Kakakin ya kara da cewa, Amurka ta yi watsi da gaskiyar cewa an fitar da wasu manhajojin AI na wasu kamfanonin Sin daf da lokacin da takwarorinsu na Amurka suka fitar da nasu, da kuma cewa wasu manhajojin AI samfurin Sin sun riga sun kasance kan gaba a fannin ikon gudanar da ayyuka.
Duk da haka, Amurka ta yi zargin cewa kamfanonin Sin sun yi satar fasaha, da karya dokar ikon mallaka, har ma bangaren na Amurka ya yi barazanar aiwatar da matakan danniya da kakaba takunkumai. Wadannan matakai ba su da wani tushe, ba su samu goyon bayan doka ba, sun kuma shaida halayyar nuna fuska biyu. Kazalika, ko shakka babu hakan danniya ce a fannin fasahar AI. (Saminu Alhassan)
