Gwamnan Jihar Gombe, Inuwa Yahaya, ya bayyana cewa duk da nasarorin da yankin Arewa ya samu a cikin shekaru shida da suka gabata, har yanzu ba a kawo karshen Boko Haram ba, kawai dai an danne su ne.
Gwamnan, wanda kuma shi ne shugaban Kungiyar Gwamnonin Jihohin Arewa (NSGF), ya bayyana hakan ne a yayin taron kungiyar Gwamnonin Arewa Maso Gabas karo na 13 da aka gudanar a Maiduguri ranar Asabar.
Ya ce: “An raunana Boko Haram, amma ba a kawo karshenta ba, kuma har yanzu muna ganin hare-hare kan al’ummominmu. ’Yan bindiga da rikicin kabilanci kuma suna kunno kai a matsayin sabbin barazana.”
Gwamna Inuwa ya ce ci gaba da rashin tsaro a yankin ya sa da dama daga cikin mutanen da abin ya shafa suka bar matsugunansu, inda har yanzu ba su iya komawa gidajensu cikin aminci ba.
Ya kuma bayyana cewa wasu muhimman ayyukan more rayuwa a yankin, kamar aikin samar da wutar lantarki na Mambilla, hada layukan dogo na yankin da fadada hanyoyin sadarwar intanet mai sauri (broadband), har yanzu ba a kammala su ba.
Ya kara da cewa yankin na ci gaba da fama da gibi a muhimman bangarorin kiwon lafiya da ilimi, lamarin da ke ci gaba da kawo cikas ga ci gaban yankin.
