A gun bikin rufe taron koli na shugabannin kamfanonin kasa da kasa na birnin Qingdao karo na 7, wanda aka gudanar a ranar Laraba 17 ga watan nan, shugaba kuma makagin kungiyar ‘yan kasuwa ta kasar Denmark dake kasar Sin, kana babban shugaban gudanarwa na kamfanin Trayton Simon Lichtenberg, ya ce matakan samar da ci gaba da kamfanonin kasa da kasa masu zuba jari a kasar Sin suke aiwatarwa, sun hada da kirkire-kirkire, da samun bunkasa mai dorewa, da hadin gwiwa mai zurfi, da kuma samun wadata tare.
A gun taron kolin, kamfanonin kasa da kasa sun amince cewa ba za a iya rabuwa da kasar Sin ba, musamman ta fannonin neman samu ci gaba a gida, da fadada zuba jari, da ma kara shiga sassan duniya.
A matsayin muhimmin taron da aka gudanar a kasar Sin, domin kamfanonin kasa da kasa, taron koli na Qingdao, ya hallara shugabannin kamfanonin kasa da kasa 322, daga kasashe da yankunan duniya 44, kuma an daddale yarjejeniyoyin manyan ayyuka 57, ciki har da guda 20 wadanda yawan jarinsu na waje ya kai dalar Amurka biliyan 2.56.
A gun taron, shugabannin kamfanonin kasa da kasa sun kan bayyanawa ‘yan jarida, muhimmiyar jimlar “Yin kokari tare”, wanda hakan ya shaida cewa, an samu sauyi dangane da huldar dake tsakanin jarin waje da kasar Sin, wato daga samarwa da sayarwa da farko, zuwa yin kirkire-kirkire, da raya kamfanoni tare.
Bana ce shekarar farko ta fara aiwatar da shirin raya kasa na shekaru biyar-biyar karo na 15 a kasar Sin, kuma kamfanonin kasa da kasa dake hada-hada a Sin sun rungumi manufar yin hadin gwiwa da samun ci gaba tare da bangaren na Sin, kana suna fatan dogaro da kasuwar kasar Sin, a sha’anin sayar da kaya, da yanayin bude kofa da hadin gwiwa, don sa kaimi ga yin amfani da albarkatun duniya yadda ya kamata, da cimma burin zama a kasar Sin, da samar da gudummawa ga duniya baki daya. (Zainab Zhang)
Discussion about this post