Babban jirgin saman daukar fasinja na C919, wanda kasar Sin ta kera a cikin gida, ya sauka lami lafiya a sabon filin jirgin saman Ulan Bator da ke kasar Mongolia a yau Laraba da yamma, bayan ya tashi daga filin jirgin saman kasa da kasa na Beijing, inda hakan ya nuna kammala tafiyar jirgin ta farko ta kasuwanci da aka yi jigilar fasinja zuwa kasashen waje kamar yadda aka tsara.
Wannan ita ce hanyar farko ta kasa da kasa da aka bude bayan da jirgin na C919 ya fara zirga-zirga ta kasuwanci, wanda hakan ke nuna sauyin da aka samu a hukumance na shigar manyan jiragen saman fasinja na kasar Sin da aka kera a gida cikin wani sabon mataki na gudanar da zirga-zirgar kasa da kasa ta yau da kullum.
A matsayin babban jirgin saman fasinja na farko da kasar Sin ta kera a cikin gida don amfanin fararen hula, an yi nasarar gwada tafiyar jirgin na C919 a hanyoyi daban-daban na cikin gida tun daga lokacin da ya fara jigila ta kasuwanci.
Ya sami karbuwa sosai a kasuwa saboda kwazon aikinsa na jigila da ya kasance abin dogaro, da ba da kulawa mai gamsarwa ga fasinjoji, da kuma ingantattun ka’idojin kiyaye aukuwar hatsari. (Abdulrazaq Yahuza Jere)
