Gwamnan Jihar Binuwai , Rabaran. Hyacinth Alia, ya zargi tsohon gwamnan jihar, Samuel Ortom, da ƙoƙarin ɗauke masa hankali daga ayyukan da yake gudanarwa, yana mai cewa hankalinsa ya karkata ne kan mulki da ci gaban jihar.
Alia ya ce ayyukan more rayuwa da bunƙasa masana’antu da gwamnatinsa ke yi za su yi magana a madadinsa yayin zaɓen gwamna na 2027. Ya ce gwamnatinsa na mai da hankali kan gina hanyoyi, da jawo jarin masana’antu, da inganta jin daɗin ma’aikata da kula da tsofaffi.
A cikin wata sanarwa da Babban Sakataren Yaɗa Labaran gwamnan, Sir Tersoo Kula, ya fitar, gwamnatin ta ce ta sanya hannu kan yarjejeniyar fahimtar juna da Hudson Global Ltd domin jawo jarin dala biliyan 5 da nufin sauya yanayin tattalin arzikin jihar.
Sanarwar ta kuma zargi gwamnatin Ortom da barin tarin basussuka, da sansanonin ’yan gudun hijira da kuma yawan korafe-korafe. Ta ce gwamnatin Alia ta samu nasarori da suka haɗa da gina hanyoyin karkara da birane, biyan albashi da kuɗaɗen sallama akai-akai.
Alia ya kuma zargi Ortom da nuna goyon baya ga jam’iyyar APC a wani lokaci, yayin da yake aiki tare da ɗan takarar shugaban ƙasa na NDC, Peter Obi, gabanin zaɓen 2027. Gwamnan ya ce ya kamata tsohon gwamnan ya amsa tambayoyi kan tarihin mulkinsa maimakon ƙoƙarin sauya abin da ya faru a baya.
