NASCON Allied Industries Plc, wanda aka fi sani da kamfanin Gishiri na Dangote, ya bai wa abokan cinikayyarsa 50 kyautar Motoci da kuɗi da darajarsu ta kai biliyoyin naira, saboda biyayyarsu da jajircewarsu wajen sayar da kayayyakin kamfanin daban-daban.
An karrama wadanda suka ci gajiyar shirin ne a yayin wani bikin cin abincin dare domin raba kyaututtukan ga abokan cinikayyar kamfanin na 2025 wanda fitaccen masanin masana’antu kuma shugaban kamfanin Dangote Group, Aliko Dangote, da mataimakin sa, Olakunle Alake suka halarta.
- INEC Na Nazarin Sauya Jadawalin Zaɓen 2027 Da Ya Faɗo A Watan Azumi
- Dalilin Gwamnatin Tarayya Na Samar Da Kundin Amfani Da Takin Zamani
NASCON Allied Industries Plc, wani reshe ne na Dangote Industries Limited, kamfani ne na Nijeriya mai samar da kayan sinadaren ƙanshin miya da abinci.
Da yake jawabi a taron, ranar Alhamis a Abuja, Shugaban rukunin kamfanonin, Alhaji Aliko Dangote, ya bayyana irin tasirin kamfanin kan yadda yake mutunta abokan cinikayyarsa wanda hakan na daga cikin muhimman ajandojin kamfanin na zama kamfanin kayan masarufi na duniya.
Shugaban ya kuma yaba wa shugaban hukumar kamfanin, da na gudanarwa da ma’aikatansa saboda jajircewarsu, ƙwarewa, da kuma gudummawar da suka bayar ga ci gaban kamfanin.
Da yake magana a madadin waɗanda suka ci gajiyar shirin, Ali Balarabe, ya yaba wa mahukuntan kamfanin, da ma’aikatansa saboda kwarewarsu da jajircewarsu.
Balarabe, wanda aka ba shi kyautar babbar mota mai nauyin tan 20 da kuma kuɗi, ya nuna godiyarsa ga wannan karramawa, yana mai cewa hakan yana nuna jajircewar kamfanin ga karfafa gwiwar abokan cinikayyarsa.
Sauran abokan cinikin da suka sami kyaututtukan, sun haɗa da Alhaji Ibrahim Achida, Muabsa Integrated Services, Fanisau Enterprises, Idris Saleh Nigeria Limited, Sani Adamu Trader, da GIA Global Concept, da sauransu.
