A kokarinta na kara bunkasa fannin aikin noma da kuma kara samar da wadataccen abinci mai gina jiki a kasar nan, gwamnatin tarayya ta fara tantance kundi na kasa na tsarin yin amfani da takin zamani a ingantacciyar kasar noma.
A ranar Talatar da ta gabata ne, aka gabatar wa da masu ruwa da tsaki a fannin aikin noma wannan kundi, a taron bita da ya gudana a Abuja.
- Babu Hannun Ganduje A Sace Dadiyata – Shehu Sani
- Akwai Lauje Cikin Naɗi Game Da Ƙudirin Amurka Kan Kwankwaso – Ali Ndume
Asusun bunkasa fannin aikin noma na kasa (NADF) tare da hadin gwiwar manyan hukumomin aikin noma da kuma sauran abokan hadaka ne, suka shirya taron kundin, a wabinsa a wajen taron, Babban Sakataren asusun Mohammed Ibrahim ya bayyana cewa; an shirya taron ne, domin cimma matsaya ta karshe kan wannan kundi, domin manona da malaman aikin gona a kasar nan su fara yin amfani da shi.
Ya kara da cewa, tun a watan Yunin 2025 ne, aka gudanar da wani karamin taro kan wannan kundi da aka tattara shi a waje guda.
Ibrahim, ya kuma yaba wa daukacin wadanda suka bayar da shawarwarinsu, wajen sake yin nazari a kan wannan kundin ya tabbata.
Ya ci gaba da cewa, takin zamani ya kasance shi ne, babban madogara a fannin aikin noma, amma dole ne a bi ka’idoji wajen yin amfani da shi yadda ya kamata.
Ya yi nuni da cewa, rashin yin amfani da shi yadda ya kamata, hakan na iya rage karkon kasar noma, wanda hakan ya nuna cewa; ya zama wajibi a samar da wannan kundi, musamman domin manoman su samu ilimin da za su rika yin amfani da takin zamanin.
Shi ma a nasa jawabin a wajen taron, wani mamallakin gidan gona mai suna Abana Waziri ya bayyana cewa; rashin yin amfani da takin zamani yadda ya dace, na ci gaba shafar samar da amfanin gona a kasar.
A cewarsa, wannan kundin zai taimaka matuka wajen yakar yunwa da kuma samar da abinci mai gina jiki a kasar.
Taron ya kuma yi kira da a karfafa hadaka, wajen ganin ana yin amfani da wannan kundi, musamman domin a kara inganta rayuwar manoman kasar da kuma kara samar da wadataccen abinci.
