Tsohon Sanatan Kogi ta Yamma, Dino Melaye, ya zargi Hukumar Zaɓe Mai Zaman Kanta ta Ƙasa (INEC) da ɗaukar matakan da yake ganin za su iya share fagen tafka maguɗi a babban zaɓen 2027. Ya yi gargaɗin cewa ƴan Nijeriya ba za su amince da duk wani yunƙuri na murɗe sakamakon zaɓen ba.
Melaye, wanda jigo ne a jam’iyyar ADC, ya bayyana hakan ne a wani saƙo da ya wallafa a shafinsa na X ranar Lahadi, 1 ga Nuwamba, 2026. Ya ce wasu ayyukan da hukumar zaɓen ke yi a baya-bayan nan suna nuna abin da ya kira shirin tafka maguɗin zaɓe tun kafin lokacin zaɓen.
Tsohon sanatan ya yi kira ga INEC da ta gyara matsayinta tare da dawo da amincewar jama’a kafin zaɓen 2027. Ya kuma jaddada cewa duk wani yunƙuri na yin maguɗi ko sauya sakamakon zaɓe zai fuskanci turjiya daga ƴan Nijeriya.
Gargaɗin nasa ya zo ne a daidai lokacin da ake ta ce-ce-ku-ce kan gano wasu hotunan da ake zargin an ƙirƙira da fasahar AI a cikin kundin rajistar masu zaɓe na farko da INEC ta fitar. Haka kuma, wasu jam’iyyun siyasa sun nuna damuwa kan cire sunayen wasu ƴan takara daga jerin sunayen ƙarshe da hukumar ta wallafa.
