Gwamnatin Jihar Kano ta ware jimillar Naira biliyan 996.29 domin aiwatar da ayyuka 1,557 a kananan hukumomi 44 na jihar cikin kusan shekaru uku na mulkin Gwamna Abba Kabir Yusuf.
Kwamishinan kula da saye da kwangiloli na gwamnati, sa ido da tantance ayyuka, Nura Ma’aji Sumaila, ne ya bayyana hakan a ranar Lahadi yayin wani taron manema labarai na kasa da kasa kan yadda ake aiwatar da ayyukan, rarraba su a fadin jihar, bin ka’idojin sayen gwamnati da kuma yadda ake tafiyar da kudaden ayyukan.
Sumaila ya ce an kammala ayyuka 867, wadanda suka kai kashi 55.68 cikin 100 na jimillar ayyukan, yayin da ayyuka 654, wato kashi 42 cikin 100, ke ci gaba da gudana. Ya kara da cewa ayyuka 26 suna matakin bayar da kwangila, yayin da wasu 10 ke shirin samun kwangila.
A cewarsa, an samu takardar ‘Certificate of No Objection (NOC)’ kan kwangilolin da kudinsu ya kai Naira biliyan 695.20, yayin da aka tantance takardun biyan kudade na ayyukan da suka kai Naira biliyan 444.75.Ya ce amincewar NOC ta wakilci kashi 69.78 cikin 100 na jimillar kudin kwangilolin, yayin da kudaden da aka tantance suka kai kashi 44.64 cikin 100.
Kwamishinan ya bayyana cewa ayyuka 598 da kudinsu ya kai Naira biliyan 299.36 suna cikin kananan hukumomin birnin Kano guda takwas, yayin da ayyuka 653 da suka kai Naira biliyan 287.90 suke a kananan hukumomin wajen gari 36.
Ya ce akwai wasu ayyuka 37 na hadin gwiwa da suka kai Naira biliyan 159.50, wadanda suka shafi kananan hukumomi da dama, yayin da ayyuka 269 na fadin jihar da sauran ayyuka suka kai Naira biliyan 249.54.
Sumaila ya bayyana cewa ayyukan da suka shafi kananan hukumomi da dama sun hada da fadada hanyoyi, gina gadoji, samar da fitilun tituna masu amfani da hasken rana, tsarin kula da zirga-zirgar ababen hawa da kuma hanyoyin da suka hada kananan hukumomi daban-daban. Ya gargadi cewa bai kamata a danganta irin wadannan ayyuka da wata karamar hukuma guda ba, domin kauce wa kirga aiki daya sau biyu.
Daga cikin manyan ayyukan da ya ambata akwai aikin gidaje masu yawa na Rijiyar Gwangwan da ke Dawakin Kudu, wanda kudinsa ya kai Naira biliyan 113.19; fadada titin Katsina kan Naira biliyan 24.77; aikin samar da kayayyakin more rayuwa na biranen zamani na Naira biliyan 21.90; hanyar Madobi-Yako-Kafin Maiyaki/Kiru mai darajar Naira biliyan 27.74; da kuma aikin gidaje na Rural Model City wanda kudinsa ya kai Naira biliyan 22.
Sai dai ya ce wasu manyan ayyuka masu tsadar gaske, ciki har da aikin gidajen Dawakin Kudu da na Rural Model City, har yanzu suna matakin bayar da kwangila ne saboda ana jiran kammala matakan da suka dace na bin ka’idojin bayar da kwangiloli.
Sumaila ya tabbatar wa al’ummar jihar da abokan huldar cewa, ma’aikatar za ta ci gaba da sa ido kan tsarin sayen gwamnati, tantance takardun biyan kudade da kuma duba ayyuka, domin tabbatar da cewa an samu cikakkiyar fa’ida da darajar kudaden da aka kashe.
