Kotun Iyali da ke zamanta a Fatakwal ta samu wani tsoho mai shekara 75, Promise Chukwumatti, da laifin lalata da wata yarinya mai shekara 11, tare da yanke masa hukuncin ɗaurin shekaru 10 a gidan yari ba tare da zaɓin biyan tara ba.
Kotun ta kuma umarci wanda aka yanke wa hukuncin da ya biya iyalan yarinyar diyya ta Naira miliyan 1, sannan a saka sunansa cikin jerin sunayen masu laifin fyade a Jihar Ribas.An gurfanar da Chukwumatti ne bisa tuhuma guda ɗaya ta lalata da ƙaramar yarinya.
Mai shari’a, Rita Oguguo, ta bayyana a hukuncinta cewa masu gabatar da ƙara sun tabbatar da laifin ba tare da wata shakka ba ta hanyar shaidu, furucin wanda ake tuhuma da kuma sauran hujjojin da aka gabatar a gaban kotu.
An bayyana cewa wanda aka yankewa hukuncin ya riƙa yin lalata da yarinyar sau da dama a gidansa bayan ya riƙa yaudararta da kuɗi yayin da take kan hanyarta ta zuwa makaranta.
Kotun ta amince da hujjojin lauyan gwamnati daga Ma’aikatar Shari’a ta Jihar Ribas, Precious Ordu, cewa Promise Chukwumatti ya aikata wannan laifi.
Justice Rita Oguguo ta ce duk da cewa wanda aka yanke wa hukuncin ya roƙi a sassauta masa hukunci, doka ta tanadi hukuncin da ya dace, tana mai bayyana cewa irin wannan laifi na iya jawo hukuncin ɗaurin rai da rai.
