Mai magana da yawun ma’aikatar tsaron kasar Sin, Zhang Xiaogang, ya amsa tambayar da manema labarai suka yi masa, dangane da munanan kalaman da sakataren tsaron Amurka ya yi a yayin dandalin tattaunawa na Shangri-La karo na 22, inda ya ce, kalaman sakataren tsaron Amurka din cike suke da ra’ayin nuna babakere da fin karfi, gami da ra’ayin cacar baka, al’amarin da ya kawo babbar illa ga ikon mulkin kan kasar Sin, da jirkita manufofin kasar, don haka kasar ta Sin ta nuna matukar rashin jin dadi da adawa da hakan.
Zhang Xiaogang ya jaddada cewa, batun Taiwan, harka ce ta cikin gidan kasar Sin, kuma Amurka ba ta cancanci ta nuna yatsa ba, kana bai kamata Amurka ta yi tsammanin yin amfani da wannan batu, wajen taka birki ga ci gaban kasar Sin ba. Tekun kudancin kasar Sin, daya ne daga cikin hanyoyin zirga-zirgar jiragen ruwa mafiya hada-hada, kuma mafi tsaro a duniya. Kuma Amurka ce barazana mafi girma ga tabbatar da zaman lafiya da kwanciyar hankali a yankin, ganin yadda take yunkurin gurgunta harkokin tekun kundancin kasar Sin, da hada baki tare da rura wutar rikici tare da wasu sassa.
Jami’in ya kara da cewa, sojojin kasar Sin za su yi kokari tare da kasashen yankin, wajen nuna adawa da ra’ayin babakere dake illata harkokin yankin Asiya da tekun Pasifik da shigar da rikice-rikice cikin yankin, da kuma kin yarda da duk wani yunkuri na tayar da yake-yake ko zaune-tsaye a yankin. (Murtala Zhang)
