Mai Mala Buni Ya Bai Wa ‘Ya’yan Sheikh Aisami Da Aka Yi Wa Kisan Gilla Aiki

Gwamna Jihar Yobe, Mai Mala Buni ya bai wa ‘ya’yan marigayi Sheikh Goni Aisami, malamin addinin Musulunci da aka kashe a jihar takardar daukar aiki su biyu.

Idan ba a manta LEADERSHIP Hausa, ta ruwaito cewa wasu sojoji biyu sun harbe Aisami a ranar Juma’a a Jaji-Maji da ke karamar hukumar Karasuwa a jihar.

• Babu Wanda Ya Bata Wa Wike Rai – Sule Lamido
• Dalilin Da Yasa Ban Halarci Taron NBA Ba – Kwankwaso 

Kakakin rundunar ’yansandan jihar, DSP Dungus Abdulkarim, ya ce an kama sojojin da suka yi yunkurin sace motar marigayin kuma za a gurfanar da su a gaban kuliya.

Buni ya bayar da wannan takardun daukar aiki ne a Damaturu lokacin da ‘yan uwan ​​marigayin suka ziyarce shi domin nuna jin dadinsu da goyon bayan da ya basu.

Ya kuma ba da tabbacin cewa za a gudanar da cikakken bincike kan halin da ake ciki dangane da rasuwar malamin.

Gwamnan ya yi alkawarin bayar da tallafi ga iyalan mamacin.

A madadin ‘yan uwa, Ibrahim Aisami, ya bayyana jin dadinsa da sakon ta’aziyya da ziyarar da wata babbar tawagar gwamnati ta kai wa iyalan.

Ya ce aikin da za a bai wa ‘ya’yan zai magance wahalhalun da iyali ke fuskanta, bayan rasuwar malamin.