A farkon watan Yuli, sakamakon guguwar “Maysak” da ta afku, an sami mummunar ambaliyar ruwa a yankin Guangxi da ke kudancin Sin. Gwamnatin Sin ta dauki matakan da suka dace kan lokaci, don tabbatar da kare lafiyar al’umma bisa iyakacin kokarinta. Abu mafi jawo hankali a aikin ceton a wannan karo shi ne kayan aiki masu fasahar zamani.
A cibiyar ba da ilimi na Xijiang na birnin Guigang, ruwan ambaliya ya kai zurfin kusan mita 5, inda dubban malamai da dalibai suka makale a dakunansu. Kananan jiragen ruwa da na roba suna iya daukar mutane goma ne kacal a lokaci guda, wanda ya kawo cikas ga saurin aikin ceto. A cikin wannan yanayi, wani nau’in jirgin ruwa na musamman ya ba da tallafi.Da shigarsa cikin ruwa, jirgin ruwan da aka nannade ya bude da kansa, sannan sassansa da yawa suka hade zuwa wani babban dandali a kan ruwa. Tsawonsa ya kai kusan mita 60, fadinsa kuma mita 8, yana iya daukar mutane fiye da 500 a lokaci guda. Masu aikin ceto sun yi nasarar jigilar sama da dalibai da malamai 6,000 cikin kasa da sa’o’i 24.
Masanin wata cibiyar binciken fasahar ayyukan gaggawa ta Sin Pang Linxiang ya ce, ” an sha yin amfani da wannan dandali wajen tinkarar ambaliyar ruwa a cikin kasar Sin, ya dace da lakabin da aka yi masa wato ‘jirgin ruwan ceton rai’.” Wannan batu ya bayyana yadda Sin take kokarin bunkasa kimiyya da fasaha don amfanar da jama’arta a duk fannoni.Ban da haka, a kauyen Liulan na birnin Hengzhou, ambaliyar ruwa ta lalata hanyoyi da gadoji, inda dubban mutane suka makale a cikin halin rashin ruwan sha da wutar lantarki da hanyoyin sadarwa.
Masu sarrafa na’urori masu tashi sama sun isa yankin, kana tun daga safiya har zuwa dare, inda suka yi ta sarrafa na’urori masu tashi sama samfurin Q100 da suka yi jigilar ruwan sha da abinci zuwa daidai wurin da mutane suka makale.
A cikin rabin yini, an kai isashen kayan agaji zuwa kauyen da ba a iya shiga.Ba wai kawai kayan agaji ba. Yankin Zhenlong ya fuskanci matsalar katsewar sadarwa saboda bala’in. Duba da hakan, kwararrun masana fasaha goma na kamfanin sadarwa na China Mobile sun dauki na’urar samar da sigina da nauyinsa ya kai kilogiram 20, suka tafi garin Zhenlong da kafa, inda suka kafa tashar sadarwa ta tauraron dan adam.
Bayan kafa tashar, siginar 4G da WiFi sun samu a yankin da kewaye, kuma mutanen kauyen da suka makale na kwanaki da yawa, sun sami damar tuntubar iyalansu.A sama akwai na’urori masu tashi sama, a kan ruwa akwai “jirgin ruwan ceto”, kuma a kasa akwai ma’aikatan sadarwa da suka kafa tashar sadarwa.
Dukkansu sun nuna bunkasuwar karfin fasahar ceto na Sin. Amma babbar darajar fasaha ba ta kasance a bangaren “neman ci gaba” kawai ba, a’a, ya kamata ta kasance mai bautawa jama’a.
Lokacin da “jirgin ruwan ceto” ya ceto dubban dalibai, lokacin da na’urori masu tashi sama suka samar da kayan agaji, da kuma lokacin da tauraron dan adam ta sake samar da sigina, sun bayyana matsayin da Sin take dauka, wato dole ne ci gaban fasaha da kimiyya ya shafi kowane mutum, ya kuma sanya muradun jama’a a gaban komai a duk fannoni, ciki hadda lokacin da ake fuskantar bala’u.(Marubuciya: MINA)
