Majalisun dokokin jihohi a faɗin Nijeriya sun fara ɗaukar matakai daban-daban kan Ƙudurin Dokar Gyaran Kundin Tsarin Mulki Karo na Shida da Majalisar Ƙasa ta aika musu, wanda ke neman halatta kafa rundunar ƴansandan jihohi (State Police). Yayin da wasu majalisun suka riga suka gudanar da karatun farko, wasu kuma na shirin fara tattaunawa da kaɗa ƙuri’a a mako mai zuwa, a daidai lokacin da ƴan tsirarun jihohi ke dakon isar ƙudurin gaban zaurensu a hukumance.
A Jihar Delta, Shugaban Majalisar Dokokin jihar kuma Shugaban Ƙungiyar Shugabannin Majalisun Dokokin Jihohin Nijeriya, Hon. Dennis Guwor, ya tabbatar da cewa majalisar za ta fara aikin duba ƙudurin dokar a ranar Talata mai zuwa, inda ya bayyana cewa ƙungiyarsu na shirin zama da Ƙungiyar Gwamnonin Nijeriya (NGF) domin daidaita matsayarsu kan tsarin kafin jihohi su ɗauki matsaya ta ƙarshe. Haka kuma a Jihar Kwara, jami’an majalisar sun tabbatar da cewa ƙudurin na samun cikakkiyar kulawa, kuma ana sa ran za a gabatar da shi a zauren majalisar domin tattaunawa da yiwuwar zartar da shi da zarar sun dawo zama a ranar Talata.
A shiyyar Arewa ta Tsakiya, Majalisun Dokokin Jihohin Neja da Benue sun samu nasarar gudanar da karatun farko (first reading) na ƙudurin a zauren majalisunsu biyo bayan dawowa daga hutu, yayin da a Jihar Filato, Shugaban Majalisa Rt. Hon. Naanlong Daniel ya bayar da umarnin hanzarta duba ƙudurin bayan Gwamna Caleb Mutfwang ya miƙa shi. Daniel ya jaddada cewa kafa ƴansandan jihohi zai taimaka matuƙa wajen magance rikice-rikicen tsaro da hare-haren da ke addabar al’ummomin Mangu, da Bokkos, da Barkin Ladi.
Dangane da yankunan Kudu maso Yamma da Kudu maso Gabas kuwa, Majalisar Dokokin Jihar Ondo ta miƙa ƙudurin ga Kwamitin Daukacin Majalisa (Committee of the Whole) domin bai wa dukkan ƴan majalisa damar tofa albarkacin bakinsu a maimakon barin sa ga kwamiti na musamman. A Jihar Imo kuma, majalisar ƙarƙashin jagorancin Hon. Chike Olemgbe ta karɓi ƙudurin inda ta tura shi ga kwamitocin shari’a da yaɗa labarai domin nazari sosai kafin a kaɗa ƙuri’ar amincewa.
Sai dai kuma, a jihohi irin su Akwa Ibom da Enugu, jami’an majalisa sun bayyana cewa har yanzu ƙudurin bai isa gaban zauren majalisun ba domin fara tattaunawa a kansa. Wannan shiri na sauya fasalin tsarin tsaro a ƙarƙashin sashi na 9 na Kundin Tsarin Mulkin 1999 na buƙatar samun amincewar aƙalla kashi biyu cikin uku na majalisun dokokin jihohi 36 na ƙasar kafin ya zama doka, matakin da ake sa ran zai kawo gagarumin sauyi ga harkokin tsaron cikin gida a Nijeriya.
