Ƙungiyar Yaqin Neman Zaben Shugaban Kasa ta Makinde-Daura (MDPCO), ta bayyana qaddamar da yaqin neman zaven Shugaba Bola Ahmed Tinubu na shekarar 2027 a Jihar Kaduna a ranar Asabar, wacce ba za ta iya ceto shi daga shan kashi a hannun dan takarar shugaban kasa na jam’iyyar APM ba, Injiniya Seyi Makinde.
Manufofin Shugaba Tinubu masu matukar tsanani, wadanda suka jefa miliyoyin ‘yan kasa cikin halin kunci da barazanar rayuwa, sun kasance a matsayin wasu alamun gazawa da suka sa ‘yan Nijeriya suka yi watsi da shi da jam’iyyarsa ta APC.’Yan Nijeriya ba sa tsammanin komai daga wannan kaddamarwar ta Tinubu, face irin yadda aka saba ji na zuba karya, yaudara, alkawuran da ba su da tushe da kuma iqirarin ayyukan da ba su taba faruwa ba, duk wadannan daga shugabannin APC da suka rasa amincewar jama’a da kuma ‘yan siyasa masu damfara wadanda kwadayi da son mulki suka hada su wuri guda.
Kasancewar Shugaba Tinubu ya zabi kaddamar da yakin neman zabensa na 2027 a Kaduna, wacce ita ce cibiyar siyasar Arewacin Nijeriya, muna kalubalantarsa da ya bayyana abin da yankin ya samu daga gwamnatinsa mara kwarewa, wacce ta fi mayar da hankali kan nuna fifiko ga ‘yan’uwa da abokan arziki (nepotism). Shin akwai abin da ya wuce yawaitar zubar da jini, tsananin wahalar rayuwa, qarya alkawura da kuma rushewar amincewar jama’a a gare shi?
Ƴan Nijeriya za su tuna cewa, a taron yakin neman zaben jam’iyyar APC na shiyyar Arewa maso Yamma da aka gudanar a Kaduna a ranar 13 ga Disambar 2022, Tinubu ya yi ikirarin cewa; “Dukkan masu tayar da hankali da masu garkuwa da mutane da masu kisa, wadanda ke barazana ga tsaron Kaduna da Arewacin Nijeriya, ina ba ku tabbacin cewa; za mu kawar da su.” Ya kuma yi alkawarin cewa, za a tabbatar da tsaro da kare kowane yanki na kasar Nijeriya.
Shekaru uku da rabi bayan nan, a karkashin mulkinsa, ‘yan bindiga da ‘yan ta’adda na ci gaba da kashe mutane da yin garkuwa da su da kuma tilasta wa ‘yan kasa barin muhallansu a yankin Arewa maso Yamma da sauran sassan Nijeriya.
Tun bayan da Shugaba Tinubu ya hau karagar mulki a shekarar 2023, wadanda aka kashe ba su gaza qasa da 13,000 a yankunan Arewacin kasar ba, yayin da aka sace wasu da dama. A duk wannan lokacin, abin da Shugaba Tinubu yake yi kawai shi ne, bayar da umarni daga fadar shugaban kasa (Villa) da kuma fitar da sanarwar manema labarai marasa tasiri, ba tare da daukar wani mataki na zahiri, don magance matsalar rashin tsaro a yankin da sauran sassan Nijeriya ba.
MDPCO ta ce, babu wani yanki na kasar da ya kamata ya zama rumbun adana zave da za a kai hari, duk bayan shekara hudu, kuma a yi watsi da shi bayan samun nasara. ‘Yan Nijeriya, duk inda suke, sun cancanci fiye da alkawarin kamfen; sun cancanci tsaro, rayuwa mai araha, samun bunkasar gonaki, wutar lantarki mai inganci, ingantaccen ilimi da shugabanci mai inganci da amana. Babu wani yanki na kasar da ya kamata ya zama tushen samun kuri’u ga masu iko da kuma za a yi sakaci da shi.
Takardar sanarwar da Richard Nnanna IhediwaDaraktan Sadarwa Na MDPCO ya sanya wa hannu ta ci gaba cewa, ya kamata Shugaba Tinubu ya fahimci cewa, ya gaza kuma ‘yan Nijeriya sun kuduri aniyar maye gurbinsa da Injiniya Seyi Makinde, wanda Ajandarsa ta ‘RESET NIGERIA’, ta samar da madadi bayyananne; mutane kafin iko, tsaro kafin farfaganda da jin daxin jama’a kafin gata na manyan mutane. Nijeriya na buqatar shugabanci, wanda ke isar da saqo, ba shugabancin da ke yaudara ba.
