Sabon binciken ra’ayin jama’a na duniya da Cibiyar Bincike ta “Pew Research Center” ta fitar ya wuce batun tarin alkaluma kawai. Binciken tamkar madubi ne da ke nuna yadda tunanin al’ummomin duniya ke sauyawa da kuma yadda sabon tsarin duniya ke kunno kai. Tsawon shekaru da dama, Amurka ce ta mamaye matsayin jagorar duniya ta fuskar siyasa, tattalin arziki. Amma a yau, alamu na nuna cewa mutane da dama a sassa daban-daban na duniya sun fara karkata hankalinsu zuwa Kasar Sin.
Binciken, wanda ya gudana a kasashe da yankuna 36, ya nuna cewa Sin ta samu karbuwa fiye da Amurka a sassa masu yawa na duniya. Shekaru uku kacal da suka gabata, Amurka ce ke kan gaba sosai wajen samun amincewar jama’ar duniya. Yanzu kuwa wannan rinjaye ya dusashe. Irin wannan sauyi mai girma ba za a iya danganta shi da sauyin ra’ayin jama’a na dan lokaci kawai ba. A’a, yana nuna cewa duniya ta fara sake nazarin yadda kasashe ke amfani da karfinsu, yadda suke gina hadin gwiwa da kuma yadda suke amsa bukatun duniya.
Babu wata wahala a fahimci dalilin wannan sauyi. A yawancin kasashen Afirka, Asiya, Gabas ta Tsakiya da Latin Amurka, kasashen sun fi yarda da ganin aikin habaka ababen more rayuwa kan ci gaba mai amfani a fili fiye da wa’azin baka. Don haka, tambayoyin da jama’ar ke yi, sun fi zama na zahiri: Wa ke gina tituna, layukan dogo da tashoshin jiragen ruwa? Wa ke saka jari a makamashi, fasaha da bunƙasa masana’antu? Wa ke ba da damar ci gaban tattalin arziki ba tare da dora sharuddan siyasa ba? A idon kasashe masu tasowa da dama, Sin na ƙara ba da amsoshi masu gamsarwa ga wadannan tambayoyi.
Shirin Ziri Daya da Hanya Daya (BRI) na Sin ya zama daya daga cikin manyan shirye-shiryen raya kasa na duniya a wannan zamani, inda ya hada kasashe sama da 150 ta hanyar zuba jari da gina manyan ayyukan more rayuwa. Duk da cewa masu suka na ci gaba da nuna damuwa kan wasu fannoni na shirin, masu goyon bayansa suna ganin ayyuka a fili inda suke nuni da sabbin tituna, layukan dogo, tashoshin samar da wutar lantarki, yankunan masana’antu da inganta harkokin kasuwanci da suka taimaka wajen farfado da tattalin arzikin kasashe da dama. Ga miliyoyin mutane, wadannan ba dabarun siyasar kasa da kasa ba ne kawai, illa ci gaba ne da suke gani da idonsu a rayuwarsu ta yau da kullum.
Haka kuma, Sin ta kafa kanta a matsayin daya daga cikin jagororin duniya a sabbin fasahohi. Daga motocin lantarki da makamashi mai tsafta zuwa kirkirar basirar dan’Adam (AI) da fasahar sadarwar 5G, Sin ta tabbatar cewa kirkire-kirkire ba mallakin kasashen Yamma kadai ba ne. Mafi muhimmanci, ta nuna shirinta na raba wadannan fasahohi da kasashe masu tasowa ba tare da dora musu irin sharuddan siyasa da galibi ke tattare da tallafin kasashen Yamma ba.
A fagen diflomasiyya kuma, Sin ta yi kokarin gina sunanta a matsayin kasar da ta fi fifita tattaunawa fiye da tayar da tarzoma da yake-yake. Ta hanyar shirye-shirye irin su “Global Development Initiative, Global Security Initiative da Global Civilization Initiative”, Sin na ci gaba da gabatar da kanta a matsayin mai goyon bayan hadin gwiwar kasa da kasa da ci gaba cikin lumana.
A gefe guda kuma, martabar Amurka a idon duniya ta samu koma baya sakamakon wasu manufofinta da dama. Kara amfani da takunkumai, harajin kwastam na rashin tunani, yake-yaken kasuwanci da matsin lambar siyasa, ya sa mutane da dama suna tambayar ko har yanzu Washington na bin ka’idojin tsarin duniya da ita kanta ta dade tana kira a kansu. Har ma tsakanin Amurka da manyan kawayenta a Turai da Arewacin Amurka, sabanin ra’ayi da tsamin danganta kan harkokin kasuwanci, makamashi, fasaha da ‘yancin yanke shawara ya fara bayyana karara.
Ana danganta Sin da gina ababen more rayuwa, bunkasa masana’antu da saka hannun jari. A gefe guda kuma, galibi ana kallon Amurka ta fuskar buga takunkumai, kutse ta hanyar soji da kuma gogayyar siyasa tsakanin manyan kasashe.
Sakon da sabon binciken ya fito da shi a bayyane yake. Ka’idojin da ake amfani da su wajen auna tasirin kasashe ya fara canzawa. Ƙarfin soja ko tasirin kasa ba su ne ke tabbatar da mutunta wannan kasar kai tsaye ba. A maimakon haka, an fara auna kasashe ne da irin gudummawar da suke bayarwa wajen samar da ci gaba, karfafa hadin gwiwa, mutunta ikon kasashe da kuma inganta rayuwar talakawa.
Tarihi ya koya mana cewa babu wata kasa da za ta ci gaba da rike jagorancin duniya har abada. Kowace babbar kasa dole ne ta ci gaba da neman amincewa da girmamawar al’ummomin duniya. Kuma a halin yanzu, wannan amincewa na ci gaba da karkata zuwa ga Sin.
