Kasashe 164 sun jefa kuri’ar nuna amincewa, a yayin da Amurka kadai ta ki, kuma da haka ne Majalisar Dinkin Duniya ta zartas da wani kuduri a kwanakin baya, wanda ke karfafa gwiwar kasa da kasa su yi watsi da taswirar duniya ta tsarin Mercator da aka yi amfani da ita sama da shekaru 450, su kuma yi amfani da sabuwar taswira mai tsarin “Equal Earth” da aka samar a shekarar 2018.
Kasar Togo ce ta gabatar da shawarar kada kuri’a ga shirin kudurin, wadda ta samu goyon baya daga Kungiyar Tarayyar Afirka. Dalilin da ya sa Majalisar Dinkin Duniya ta karfafa gwiwar kasa da kasa wajen fara amfani da taswira mai tsarin “Equal Earth”, ba saboda takaddamar filayen kasa ba ne, sai dai saboda kuskuren da ake samu a taswirar da ake amfani da su a yanzu, wato mai tsarin Mercator, wadda masanin taswira dan kasar Netherlands mai suna Mercator ya kirkira a shekarar 1569, a kokarin magance matsalolin da aka fuskanta wajen jagorantar zirga-zirgar jiragen ruwa, sai dai wannan tsarin taswira ya haifar da rashin gaskiyar fadin filaye, wato kasashen da suke nesa da ikwaitar duniya, an kara girmansu a taswirar, don haka, in mun duba taswirar, fadin nahiyar Afirka tamkar ya yi daidai da na tsibirin Greenland, amma hakikanin gaskiyar ita ce fadin Afirka ya ninka na Greenland har sau 14.
Ga kasashen Afirka, wannan ba batun fasahar zana taswira ba ne, a’a, a maimakon haka, batu ne na gyara bahaguwar fahimtar nahiyar ta tsawon sama da shekaru 450. Ministan harkokin wajen Togo, Robert Dussey, a jawabin da ya gabatar a taron Majalisar Dinkin Duniya ya ce: “Taswira mai adalci ba za ta canza yanayin yankunan duniya ba, abin da za ta canza shi ne yadda muke kallon duniya.” Cikin sama da shekaru 450 da suka wuce, yaran duniya baki daya, har da na Afirka, taswirar da ta rage girman Afirka suke gani a makarantu. Kungiyar Tarayyar Afirka ita ma ta nuna cewa sama da shekaru 450, duniya tana fahimtar Afirka a kan “taswirar da ba daidai ba.”
A matsayinta na kasa daya tilo da ta kada kuri’ar kin amincewa, Amurka ta bayyana cewa, wannan kudurin yana da ma’anar siyasa mai zurfi a bayansa, yayin da rahoton kamfanin dillancin labarai na Faransa AFP ya yi nuni cewa, taswirar mai tsarin “Equal Earth” ta rage girman Amurka da Turai a taswirar, kuma hakan ya jawo rashin jin dadin Amurka. Lallai, ita Amurka ta ki amincewa da sauya taswirar ne domin ta riga ta saba da wannan girman da aka kara mata.
Abin farin ciki shi ne, yawancin kasashen duniya sun goyi bayan Afirka. Faransa a ranar kada kuri’ar ta sanar da cewa za ta yi watsi da amfani da taswira mai tsarin Mercator.
Ministan harkokin wajen kasar, Jean-Noël Barrot ya ce: “Canza taswirar da ake amfani da ita ba zai iya canza duniya ba, sai dai hakan zai gyara hanyar nunawa da ba ta dace ba, wanda shi kansa aiki ne na kiyaye gaskiya.”
A lokacin da Togo ke jawabi a madadin kasashen Afirka a babban taron Majalisar Dinkin Duniya, kuma a lokacin da kasashe 164 suka amsa kiran “gyara bahaguwar fahimta” da kuri’un nuna amincewa, wannan ba sauyin fasahar zana taswira ba, maimakon haka canji ne mai zurfi da ke faruwa ga tsarin duniya, wato kasashe masu tasowa ba za su zama ’yan kallo masu shiru ba, kuma kasashen Turai ma ba za su ci gaba da bin jagorancin Amurka ba, kuma duniya na sabawa da yanke shawara ba tare da amincewar Amurka ba.
Daga shekarar 1569 zuwa 2026, daga karshe an kai ga gyara wannan kuskuren nuni a taswira. Fadin Afirka bai taba canzawa ba, abin da ya canza shi ne yadda duniya ke kallonta. A yayin da yaran Afirka a taswira suke ganin girman da ya dace na nahiyarsu, ba wai kawai fahimta madaidaiciya suka samu ba, har ma da wani matsayi mai adalci, wato Afirka ta ki a sake “rage” girmanta, sabo da ita kanta nahiya ce mai fadi, wadda har ta kai ga za ta iya daukar nauyin makomarta, kuma ta kai ga duniya ba za ta iya kyale ta ba.
