Zaman taro na shekara-shekara na dandalin tattaunawa na nahiyar Asiya na Boao na shekarar 2026 da aka kammala a jiya 27 ga wannan wata yana da babbar ma’ana, wato an gudanar da shi a shekarar farkon shirin raya kasa na shekaru biyar-biyar karo na 15 na kasar Sin, da cika kwanaki 100 da fara aiwatar da matakan kwastam na musamman a daukacin sassan tsibirin Hainan, da kuma cika shekaru 25 da kafuwar dandalin tattaunawar, don haka taron dandalin a wannan karo ya fi jawo hankalin kasa da kasa, inda wakilai kimanin 2000 daga kasashe da yankuna fiye da 60 na duniya suka halarta.
A halin yanzu, ana fuskantar yanayin maras tabbaci a duniya, da tsanantar rikicin siyasa a tsakanin wasu kasashe, da fitowar ra’ayin ba da kariya ga cinikayya, da kuma rashin karfi wajen bunkasa tattalin arzikin duniya. Bisa wannan yanayi, taken taron dandalin tattaunawar a wannan karo wato “Kirkiro makoma ta bai daya: Sabon yanayi, sabon zarafi, da sabon hadin gwiwa” ya dace da begen jama’ar kasa da kasa.
A gun taron dandalin tattaunawar, Sin ta ba da shawarwari guda hudu wato yin watsi da rikici, da rufe kofa, da cin zarafin ‘yantacciyar kasa da kuma nuna bambanci ga sauran kasashe, don kirkiro kyakkyawar makoma mai zaman lafiya da hadin gwiwa da adalci da kuma girmama juna da imani da juna baki daya. Shawarwarin sun samu amincewa daga mahalartar taron, kuma sun yi nuni da cewa, tun daga shawarwarin Sin a gun taron Boao zuwa jerin shawarwarin Sin dake shafar harkokin duniya, wannan ya shaida cewa, Sin ta fi maida hankali ga bude kofa ga kasashen waje.
A shekarun baya-baya nan, kasar Sin tana daukar matakai don fadada bude kofa da more damarmaki tare da kasa da kasa. Don haka, shugaban kungiyar cinikayya a tsakanin Birtaniya da Sin ta kasar Birtaniya Peter Burnett ya bayyana cewa, har kullum, yana ba kamfanonin Birtaniya masu sayar da kayayyaki ko samar da hidimomi shawarar su zabi kasar Sin idan suna son cimma nasara a duniya. (Zainab Zhang)
Discussion about this post