Tambaya:
Assalamu alaikum malam, wai miji ne ya ce wa matarshi idan ta fita ta kofar nan a bakin aurenta, kawai sai ta fita ta taga (window), wai shin ta saku?
Amsa:
Ba ta saku ba, saboda ya rataya sakin akan sharadi kuma sharadin bai tabbata ba. Duk lokacin da aka rataya abu akan sharadi, ba ya zartuwa idan sharadin ya goce.
Allah ne mafi sani.
Azumi Nawa Ake Yi A Watan Muharram?
Tambaya:
Assalamu alaikum Don Allah malam azumi nawa ake yi a watan Muharram?
Amsa:
Wa alaikum assalam To ‘yar’uwa ana so mutum ya zage dantse wajan yin Azumi a wannan watan, saboda fadin Annabi (SAW) : “Mafificin Azumi bayan Ramadhana shi ne Azumi a watan Muharram” kamar yadda Muslim ya rawaito
Amma Wanda ya fi muhimmanci shi ne na ranar goma ga wata, sai kuma na ranar tara, Annabi S.A.W yana cewa: “Azumin ranar goma ga wata yana kankakare zunubin shekara daya” kamar yadda Muslim ya rawaito a hadisi mai lamba ta: (1162), sannan yana cewa: “Idan na rayu zuwa badi zan azumci ranar ranar tara ga MUHARRAM”.
Allah ne mafi sani.
Fatawar Rabon Gado (67)
Tambaya:
Assalamu alaykum Dr. Mace ce ta rasu ta bar uwayenta guda biyu da diya mata guda biyar, shin yaya rabon gadon ta zai kasance?
Amsa:
Wa alaikum assalam, za’a raba abin da ta bari gida: 6, a bawa mahaifanta kashi dai-dai, sai kuma a bawa ‘ya’yanta kashi hudun su raba.
Allah ne mafi sani
Ya Halatta Na Sayi Kare Saboda Gadi A Gidana?
Tambaya:
Assalamu alaikum. Dr. Mene ne hukuncin ajiye kare a gida saboda gadi? Allah muke roko ya kara wa Dr lafiya da basira Ameen.
Amsa:
Wa’alaikum assalam, Ya tabbata a hadisin Bukhari da Muslim cewa: “Mala’iku ba sa shiga gidan da yake akwai hoto ko Kare a ciki.
A wani hadisin mai lamba ta: 2974 da Muslim ya rawaito Annabi s.a.w. yana cewa: “Duk Wanda ya rike kare, in ba Karen noma ba ko farauta ko kiwo, to Allah zai tauye masa manyan lada guda biyu a kowacce rana.
Da yawa daga cikin malamai sun yi kiyasin Karen gadi akan wadancan nau’ukan guda uku da suka gabata, don haka ya halatta musulmi ya riki Kare saboda gadi in har akwai bukatar hakan.
Ba ya halatta a siyar da kare kowanne iri ne, saboda Annabi (SAW) ya hana cin kudin Kare a hadisin da Muslim ya rawaito kuma ya kira Shi da dauda.
Duk da cewa an halatta wadancan nau’ukan guda hudu saboda bukata saidai bai halatta a siyar da su ba, saboda Ka’ida sananniya a wajan malaman Fikhu.
Idan mutun yana bukatar daya daga cikin wadanchan nau’uka na karnuka guda huɗu da suke halatta, kuma bai samu wanda zai ba shi kyauta ba, ya halatta ya siya, Amma zunubin sayarwar yana kan wanda ya sayar tun da shi ne bai bayar ba, kamar yadda Ibnu Hazm ya fada a littafinsa na Muhallah 4/793.
Allah ne mafi sani.
Zina Ba Ta Daukan Hukuncin Aure!
Tambaya:
Assalamu Alaikum malam ina da tambaya, Yaro ne karami wanda bai balaga ba, sai wata matar aure ta ringa kiransa tana zina dashi. To sai bayan wasu shekaru masu yawa matar ta daina zina dashi sai matar ta haifi yarinya mace sai shi wannan yaron yaga wannan ‘Yar matar kuma yana son ya auri yarinyar, shin ya halatta ya aure ta?
Amsa:
Wa’alaikum assalam, Tun da alkalami bai hau kansa ba, ai abin da ya yi ba sunansa zina ba shi a bangarensa, sannan zina ba ta daukar hukunce-hukuncen aure a yawancin wurare.
Ya halatta ya aure ta, tun da ba da maniyinsa aka halicce ta ba, tare da cewa barin auran shi ne ya fi a fahimtata, tun da babu tabbacin yarinyar da zai aura din ‘yar halal ce, tun da babarta mazinaciya ce, kin ga idan BALLI ya tashi daga baya ran ma’auratan zai iya tashi.
Allah ne mafi sani.
Fatawar Rabon Gado (68)
Tambaya:
Assalamu alaikum tambaya mutum ne ya mutu yabar mace da yan’uwansa shakikai ba yara kuma mahaifansa sun mutu to Meye kason matar tasa?
Amsa:
Wa alaikum assalam, za’a raba abin da ya bari gida:4, a bawa matarsa kashi daya, ragowar ukun sai a bawa ‘yan’uwansa shakikai.
Allah ne mafi sani.
Hukuncin Yin Dilka A Musulunci
Tambaya:
Mace ta ba da jikinta ga mata yan’uwanta don a yi mata wanka saboda kwalliya ko irin dilka da halawa din nan wai haramun ne? Ko da ta rufe mamanta da mazaunanta? In haramun ne kenan daga ina zuwa ina ne tsiraicin mace da bai kamata yar’uwarta mace ta gani ba? Jazakallahu khairaljazaaa.
Amsa:
To ‘yar’uwa malamai sun yi sabani game da tsaraicin mace ga ‘yar’uwarta musulma, akwai wadanda suka tafi akan cewa : bai halatta ‘yar’uwarta mace ta ga wani abu a jikinta ba, sai abin da ya saba bayyana a tsakanin mata, idan suna zaune isu-isu, kamar kafa da hannu da fuska da wuya da makamacin haka.
Saidai abin da mafi yawan malaman fikhu suka tafi akai shi ne : al’aurar mace ga ‘yar’uwarta musulma tana farawa ne daga cibiya zuwa guiwa, kamar yadda al’aurar maza take a tsakaninsu.
Don haka bai hallata ta bari wata mace ta kalli sama da wannan wurin da aka iyakance ba, amma idan kafira ce matar to malamai sun yi bayani cewa ba za ta kalli wani abu ba, sai abin da ya saba bayyana, don haka sai a kula lokacin da za’a je dilka wajan wacce ba musulma ba, don kada garin neman gira a rasa ido.
Sannan a bisa wannan bayanin da kika yi, dilkar da kika siffanta za ta zama ba ta halatta ba, tun da za’a ga abin da shari’a ba ta hallatata a gani ba.
Fatawar Rabon Gado (69)
Tambaya:
Assalamu Alaikum, Malam don girman Allah a taimake ni da Amsan tambaya ta kamar haka Mace ce ta mutu bata da iyaye ba Da ba jika sai kanwarta guda daya shakikiya sai kuma li’abbai guda biyar biyu maza uku mata. Ya za’ayi rabon gadon ta?
Amsa:
Wa alaikum assalam, Za’a raba abin da ta bari gida 2, sai a bawa shakikiyar rabi, ragowar kuma sai a bawa li’abban su raba a tsakaninsu, duk namiji zai dau RABON mata biyu.
Allah ne mafi sani.
