Dan takarar Shugaban Kasa a jam’iyyar APC, Bola Ahmad Tinubu ya bayyana cewar zaben APC a 2023 shine mafita ga al’ummar Nijeriya.
Ya ce idan aka zabe shi zai jagoranci kawar da matsalolin al’umma wadanda suka hada da fannonin yaki da cin hanci da rashawa, samar da aikin yi tare da bunkasa aikin gona da habaka kasuwanci.
Dan takarar na APC ya bayyana hakan ne a wajen gangamin yekuwar neman zabensa da aka gudanar yau a Sakkwato yana cewar ba zai taba yin kasa a guiwa ba wajen aiwatar da mulki nagari.
A jawabinsa Shugaban Kasa Muhammadu Buhari ya bayyana cewar Tinubu ne dan takarar da jam’iyyar APC ta tsayar don haka a zabe shi a zaben da ke tafe.
“Jam’iyyar mu ce ta tsayar da Tinubu, don haka za mu mara masa baya, wadanda suka zo su fadawa wadanda ba su zo ba.” In ji Shugaba Buhari a takaitaccen jawabinsa.
