Jam’iyyar NDC a Jihar Zamfara ta soki Gwamna Dauda Lawal kan tafiyarsa zuwa Habasha bayan wani mummunan hari da aka kai a Bindin, Ƙaramar Hukumar Maru, wanda ya yi sanadin mutuwar mutane.
Rahotanni sun ce sojoji 12 da masu haƙar ma’adinai biyar ne suka rasa rayukansu a harin, sai dai har yanzu rundunar sojin ba ta tabbatar da adadin waɗanda suka mutu ba.
An ce tashin hankalin ya fara ne ranar Litinin, kodayake rahotanni sun bambanta kan ko harin da aka kai wa sansanin sojoji ya faru a ranar Litinin ko Talata.
A cikin wata sanarwa da Sakataren Yaɗa Labarai na NDC, Murtala Gusau, ya sanya wa hannu, jam’iyyar ta zargi Gwamna Lawal da yin watsi da jihar a lokacin da al’ummar yankin da lamarin ya shafa ke zaman makokin waɗanda suka mutu.
Gwamnan ya bar Nijeriya ranar Talata a yayin da yake cikin tawagar Gwamnatin Tarayya ƙarƙashin jagorancin Mataimakin Shugaban Ƙasa, Kashim Shettima, zuwa Addis Ababa, domin halartar wani taro a kasar Habasha, wanda aka shirya gudanarwa daga 7 zuwa 9 ga Oktoba.
Jami’in Hulɗa da Jama’a na Rundunar ’Yansandan Jihar Zamfara, Yazid Abubakar, ya tabbatar da faruwar harin Bindin a wata tattaunawar wayar tarho da jaridar PREMIUM TIMES ranar Laraba.
Da aka tuntuɓi jami’an soji da ke aiki a yankin, ba su tabbatar da adadin sojojin da suka mutu a yayin harin ba, sai dai sun bayyana cewa, rundunar tana ci gaba da gudanar da ayyukan tsaro a yankin.
