Dan takarar shugaban kasa na Jam’iyyar NDC, Peter Obi, ya bayyana Nijeriya a matsayin “kasa mafi kuncin rayuwa duk da ‘yancin kai da ta samu”, yana zargin gwamnatin APC da gaza dakile karuwar talauci, rashin tsaro, rashin aikin yi da yunwa a kasar.
Obi ya bayyana hakan ne a cikin sakonsa na ranar ’Yancin Kai, yayin da Nijeriya ke bikin cika shekaru 66 da samun ’yancin kai a ranar Alhamis.
Ya ce duk da alkawuran da gwamnatin APC ta yi a shekarar 2023, kasar na ci gaba da fuskantar matsaloli masu tsanani a kusan dukkan muhimman ɓangarorin rayuwar ‘yan kasa.
Obi ya ce: “Duk da alkawuran da gwamnatin APC ta yi a shekarar 2023, al’ummarmu na ci gaba da fuskantar matsaloli masu tsanani a kusan dukkan muhimman ɓangarorin rayuwar su.”
Ya kara da cewa Nijeriya ta zama kasa da ke da adadi mafi yawa na mutanen da ke rayuwa cikin talauci da mawuyacin hali, inda ya kiyasta adadin ya haura miliyan 140.
Ya kuma yi ikirarin cewa Nijeriya na da adadi mafi yawa na yara da ba sa zuwa makaranta, wanda ya ce ya haura miliyan 80, tare da bayyana kasar a matsayin daya daga cikin kasashen da ke fama da matsanancin ta’addanci da rashin tsaro, sakamakon yawaitar ’yan bindiga da masu garkuwa da mutane.
Tsohon gwamnan Jihar Anambra ya kuma yi nuni da mutuwar matasa 37 a hannu hukumar NSCDC kwanan nan, tare da nuna damuwa kan matsalar yunwa da kuma yawan mace-macen jarirai da mata masu juna biyu a Nijeriya.
