Kungiyar Kwadago ta Nijeriya (NLC) ta goyi bayan bukatar ma’aikatan gwamnati na ganin an ƙara mafi ƙarancin albashi zuwa N500,000, tare da rage farashin man fetur zuwa N500 kan kowace lita domin rage matsin tattalin arzikin da ma’aikata da iyalansu ke fuskanta.
Bukatar ta fito ne daga Ƙungiyar Haɗin Gwiwar Majalisar Tattaunawar Ma’aikatan Gwamnati (JNPSNC), reshen ƙungiyoyin kwadago, a cikin wata wasiƙa da ta aika wa Shugaba Bola Ahmed Tinubu.
Sakataren ƙasa na ƙungiyar, Olowoyo Gbenga, ya kuma nemi gwamnatin tarayya ta kafa kwamitin tattaunawa kan sabon mafi ƙarancin albashi nan take, gabanin watan Janairu 2027.
Ƙungiyar ta ce ƙarin farashin man fetur zuwa N1,430 ko sama da haka a wasu wurare ya ƙara tsananta tsadar rayuwa, tare da yin illa ga farashin kayan masarufi da sauran bukatun yau da kullum.
Ma’aikatan sun bai wa gwamnati wa’adin zuwa Laraba, 30 ga Satumba 2026, domin ɗaukar mataki kan bukatunsu, suna gargadin cewa halin da ake ciki na ƙara haifar da damuwa da matsaloli tsakanin ma’aikata da sauran ’yan Nijeriya.
JNPSNC ta ƙunshi ƙungiyoyin ma’aikatan gwamnati da dama, ciki har da Kungiyar Ma’aikatan Nijeriya, Kungiyar Ma’aikatan Kiwon Lafiya, Kungiyar Manyan Ma’aikatan Nijeriya, da Kungiyar Malaman Jinya da Ungozoma.
Ƙungiyar ta ce cire tallafin man fetur shekaru uku da suka gabata ya haifar da tashin farashin mai, wanda ya janyo ƙarin farashin kayan masarufi da sauran abubuwan more rayuwa.
Ta ƙara da cewa raba tallafin kayan abinci ga jama’a ba zai zama mafita mai ɗorewa ga matsalar tattalin arziki ba, tana mai cewa ana buƙatar matakan da za su magance tushen matsalar tsadar rayuwa.
