Kungiyar Malaman Nijeriya (NUT) reshen jihar Borno, ranar Talata, ta shiga wata zanga-zangar nuna adawa da karuwar sace yara da dalibai daga makarantu a fadin jihar.
Zanga-zangar, wadda ta kai mambobin kungiyar zuwa gidan gwamnati da manyan titunan Maiduguri, ta biyo bayan umarni daga shugabancin kungiyar na kasa cikin wata takarda mai dauke da kwanan watan 29 ga Mayu, 2026.
Takardar, wadda shugaban kungiyar na kasa, Audu Amba, da sakataren kungiyar na kasa, Clinton Ikpitibo, suka sanya wa hannu tare, ta umarci dukkan rassan jihohi su shirya zanga-zangar goyon baya domin jawo hankalin kasa kan tabarbarewar matsalar tsaro da ke shafar makarantu da masu karatu a fadin Nijeriya.
Lamarin na zuwa ne bayan sace dalibai da malamai da aka yi kwanan nan a jihohin Borno da Oyo.
Sakataren NUT na jihar Borno, Bako Monguno, da sakataren yada labarai na kungiyar na kasa, Yusuf Tom, ne suka jagoranci zanga-zangar, inda suka bukaci gwamnati da jami’an tsaro su dauki matakan gaggawa domin tabbatar da tsaron makarantu tare da kubutar da daliban da aka sace.
Da yake jawabi yayin zanga-zangar, Tom ya ce kungiyar na amfani da wannan zanga-zanga ne domin neman gwamnatin ta dauki matakin gaggawa kan karuwar sace dalibai daga makarantu.
