Da safiyar yau Laraba ne Peng Liyuan, uwargidan shugaban kasar Sin Xi Jinping, da Ngo Phuong Ly, uwargidan shugaban kasar Vietnam To Lam dake ziyara a kasar Sin, suka ziyarci babban dakin wasannin kwaikwayo na kasar Sin dake nan birnin Beijing.
Yayin ziyarar, Peng Liyuan ta bayyana cewa, Sin da Vietnam suna makwabtaka da juna, kana suna da al’adu kusan daya, yayin da jama’ar kasashen biyu suke sada zumunta da juna, tana fatan hukumomin al’adu, da masu fasaha na kasashen biyu za su yi hadin gwiwa, da mu’amala da juna ta hanyoyi daban daban, don kara sada zumunta a tsakanin kasashen biyu da jama’arsu baki daya.
A nata bangare, Ngo Phuong Ly ta godewa Peng Liyuan, bisa shirya mata wannan ziyara, tana mai jinjinawa nasarorin da Sin ta samu a fannnonin raya al’adu da fasaha, kana ya yi fatan kara sa kaimi ga mu’amalar al’adu, da fasaha, da kuma sada zumunta a tsakanin kasashen biyu. (Zainab Zhang)
