Kawance a tsakanin jihohin arewacin Najeriya da kamfanonin kasar Sin ba sabon abu ba ne, zan iya cewa an kwashi shekaru da dama ana yi, sai dai abin da ya ja hankalina a kwanan shi ne ziyarar da jakadan kasar Sin da ke Najeriya, Yu Dunhai ya kai jihar Kano da kuma kawancen da aka kulla a tsakanin gwamnatin jihar Zamfara da wasu kamfanonin kasar Sin domin gudanar da wasu ayyukan raya kasa.
Ziyarar jakadan na Sin a fadar gwamnatin Kano ta kunshi kyakkyawan albishir ga jihar a kan karfafa alaka a tsakaninsu domin bunkasa ayyukan more rayuwa da bunkasa ci gaban masana’antu a jihar. Kana da yabawa da yadda Sinawa ke jin dadin gudanar da kasuwancinsu a jihar ta Kano ba tare da tsangwama ba.
- Sin Na Fatan Dukkan Bangarori Za Su Guji Daukar Mataki Da Zai Ta’azzara Rikici A Gaza
- Dakatar Da Gwamna Fubara: Tinubu Ya Naɗa Tsohon Hafsan Sojin Ruwa A Matsayin Mai Kula Da Jihar Ribas
Har ila yau, kasar Sin ta sha alwashin kulla kawance da jihar a fannonin noma na zamani da karfafa samar da wadatar abinci da kayayyakin more rayuwa da kuma bunkasa ci gaban ilimi, inda Jakada Yu Dunbai ya bukaci gwamnatin jihar ta yi kokarin cin gajiyar makudan kudin da kasar ke zuba jarinsu a Najeriya.
A can jihar Zamfara ma, gwamnatin jihar ta karbi bakuncin wasu kamfanoni na kasar Sin a fadarta da ke Gusau, babban birnin jihar inda aka tabbatar da hada hannu a tsakaninsu a fannonin samar da ingantattun fasahohin zamani da habaka noma, da sufuri da albarkatun ma’adanai da Allah ya huwace wa jihar.
Kamfanonin da suka je ziyarar bayan gwamna Dauda Lawal na jihar ya fara kai musu ziyara a kasar Sin a watan Fabrairun da ya gabata, sun hada da: Zhong Zhao International Group, Phoenix Wings, Shenzhen HighGreat Innovation Technology Development Co., Ltd, da Xiamen Magnetic North Technology Co. Ltd, da kuma Tibet Ming.
A dunkule, ayyukan da wadannan kamfanoni za su gudanar sun kunshi samar da wadataccen takin zamani da fasahar noma ta zamani, da dabarun sarrafa takin gargajiya da fasahar kiwo mafi dacewa da jihar. Haka nan, kawancen nasu zai hada har da amfani da fasahohin zamani wajen kyautata sha’anin tsaro, da harkokin sufuri da bangaren hidindimun jama’a, da sauran dabaru da tsare-tsare na kwarewar aiki da za a samar a jihar.
Hakika wannan kawance zai fa’idantar sosai saboda yadda yankin na arewa ya kwashi tsawon wasu shekaru yana kaka-ni-ka-yi da matsalolin dake tarnake ci gabansa sakamakon mummunar matsalar tsaro musamman ma a jihar Zamfara wadda ta zama babbar tungar ’yan bindiga.
Kwararru a fannin sha’anin tsaro, sun sha nanata cewa matukar ana so a magance matsalar tsaron da ta hana arewacin Najeriya sakat dole sai an hada da magance zaman kashe wando, da bunkasa tattalin arziki da kuma samar da na-gartaccen ilimi.
Sabon yunkurin jihohin arewa na kulla kawance da kamfanonin Sin babu shakka zai bude kofofin karfafa tattalin arzikin yankin wanda Allah ya albarkace shi da kasar noma mai kyau fiye da sauran sassan Najeriya, sannan ga tarin albarkar yawan jama’a, da albarkatun sarrafa sabbin makamashi, domin kamfanonin Sin suna da kwarewar aiki da dimbin ayyuka na fasahar zamani ta yadda suke iya sarrafa albarkatu kalilan a samar da amfani mai yawa. Sannan suna da karfin zuba jari fiye da yadda ake zato, domin ko a watan Satumban 2024, gwamnatin jihar Neja da ke arewacin Najeriya ta rattaba hannu da wasu kamfanonin Sin guda biyu –COVEC da CREC a kan kwangilar dala miliyan 684 domin gudanar da ayyukan gona na musamman a jihar.
Tabbas, jihohin sun dauki hanya mai kyau da za ta fa’idantar, fatana shi ne a wayi gari yankin arewa ya dawo da martabarsa ta ci gaban tattalin arziki da kyautata rayuwar al’umma.(Abdulrazaq Yahuza)
