A ranar 1 ga watan Yulin 2026, Jam’iyyar Kwaminista Kasar Sin (JKS) za ta cika shekaru 105 da kafuwa, babban lamarin da ya dace a yi waiwaye kan daya daga cikin manyan sauye-sauyen ci gaba da tattalin arziki a tarihin duniya na zamani.
A karkashin jagorancin jam’iyyar, kasar Sin ta sauya daga kasa mai fama da talauci da dogaro da noma zuwa kasa ta biyu mafi girman tattalin arziki a duniya, cibiyar masana’antu ta duniya, kuma jagora a fannonin kimiyya, fasaha da bunkasa ababen more rayuwa.
Nasarorin da kasar ta samu a shekarun baya-bayan nan sun cancanci a yi nazari na musamman a kansu. Duk da rikice-rikicen siyasa da tattalin arziki a duniya da kuma kalubalen cikin gida, tattalin arzikin kasar Sin ya ci gaba da bunkasa a lokacin shirin raya kasa na shekaru biyar-biyar na 14, inda darajar tattalin arzikinta ya tashi daga sama da yuan tiriliyan 110 a shekarar 2021 zuwa fiye da yuan tiriliyan 140 a shekarar 2025.
Ga kasashe masu tasowa, kwarewar kasar Sin na dauke da muhimman darussa.
Na farko shi ne muhimmancin tsare-tsare na dogon lokaci da kuma dorewar manufofi. Ta hanyar shirye-shiryen raya kasa na shekaru biyar-biyar, kasar Sin ta ci gaba da aiwatar da manufofinta cikin tsari da daidaito ba tare da sauye-sauyen siyasa da ke hana ci gaba ba.
Na biyu shi ne muhimmancin zuba jari a ababen more rayuwa, masana’antu da bunkasa ilimi da kwarewar al’umma. Hanyoyi, layukan dogo, tashoshin jiragen ruwa, makamashi da kuma ilimi sun samar wa kasar Sin ginshikin ci gaban tattalin arziki da inganta rayuwar jama’a.
Na uku kuwa shi ne muhimmancin kimiyya, fasaha da kirkire-kirkire wajen tafiyar da tattalin arzikin zamani. Ci gaban da kasar Sin ta samu a masana’antun zamani, fasahar zamani da tattalin arzikin dijital ya nuna amfanin saka hannun jari a fannin bincike, ilimi da fasaha.
Haka kuma, abin da ya dace a kara lura da shi, shi ne jajircewar kasar Sin wajen bunkasa ilimi, gina kwarewar ma’aikata da kuma inganta kirkire-kirkire a fannin fasaha. Gagarumar nasarar da kamfanonin kasar Sin suka samu a fannoni kamar kere-keren zamani, na’urorin mutum-mutumi, motocin lantarki, makamashi mai sabuntawa da kuma kwaikwayon fasahar basirar dan Adam (AI) ba ta zo ne kwatsam ba, face sakamakon shekaru da dama na zuba jari mai dorewa a ilimi, binciken kimiyya da kuma koyar da kwarewa.
A wannan karni na ashirin da daya, kasashen da suka yi watsi da kimiyya, fasaha da kirkire-kirkire, dole za su fuskanci hadarin kasancewa a baya a cikin tattalin arzikin duniya dake tattare da gasa.
Har ila yau, nasarar da kasar Sin ta samu wajen rage talauci ta cancanci kulawa ta musamman. Fitar da daruruwan miliyoyin mutane daga kangin talauci cikin shekaru da dama na daga cikin manyan nasarorin da aka taba samu a tarihin ci gaban bil’adama.
Wannan kwarewa ta nuna cewa, ainihin ma’aunin ci gaban tattalin arziki ba wai kawai yana cikin alkaluman tattalin arziki ba ne, amma yana cikin irin ci gaban da ake samu a rayuwar jama’a, walwalarsu da kuma damar da ake samar musu domin inganta rayuwarsu.Ko da yake kowace kasa tana da nata yanayi da kalubale na musamman, manyan darussan da ake iya koya daga nasarar kasar Sin sun hada da hangen nesa na dogon lokaci, shugabanci mai inganci, saka hannun jari a rayuwar mutane da kuma jajircewa wajen cimma manufofin ci gaban kasa.
Yayin da Jam’iyyar Kwaminis ta Kasar Sin ke bikin cika shekaru 105 da kafuwa, kuma kasar Sin ke fara sabon shirin raya kasa na shekaru biyar-biyar na 15, kwarewarta na ci gaba da zama wata muhimmiyar hanya ta koyo ga kasashe masu tasowa da ke neman bunkasa tattalin arziki da zamanantar da kasashensu.
ADVERTISEMENT
