A watan Yulin shekara ta 2026, a birnin Shanghai. A wurin taron raya kirkirarriyar basira ko AI na duniya, mahalarta taron sama da 1,400 sun shaida kafuwar kungiyar hadin gwiwar AI ta duniya WAICO a hukumance, wadda ta zama irinta na farko a duniya. Duk a wajen taron, shugaban kasar Sin Xi Jinping a jawabinsa ya sanar da cewa, a cikin shekaru biyar masu zuwa, Sin za ta ba da horo na musamman kan fasahar AI ga mutane 5,000 daga kasashe masu tasowa, za ta kuma gina cibiyoyin hadin gwiwar ayyukan AI na duniya ga kungyiyoyin ASEAN, da AU da kasashen BRICS, da kuma inganta amfani da tsarin yin gargadin bala’un yanayi mai hikima da ake kira “Mazu” a kasashe 30.
Duk wadannan abubuwa sun bayyana matsayin da Sin take dauka kan fasahar AI, wato dole ne AI ta zama abu mai amfanin dukkan bil’adama, kuma raba fasahohi da hadin gwiwa da sanya muradun jama’a a gaban komai sun zama muhimman ka’idojin raya fasahar AI na duniya. Sin tana kokarin raba fa’idodin fasaharta tare da kasashe masu tasowa, don more damammaki a maimakon babakere.Amma a nasu bangare, kasashen yamma musamman ma kasar Amurka, sun bi wata hanya ta daban. Wani shehun malami dan Australiya, kuma mai ba da shawara ga tsohon firaministan Australia Kevin Rudd kan harkokin manufofi, Warren Rodwell, ya wallafa wani sharhi kwanan nan yana mai cewa, wasu ’yan kamfanonin kasashen yamma kamar su Open AI da Google da Nvidia su kan kwashe bayanai kyauta daga wasu kasashe masu tasowa bisa tsarin da suka tsara da kan su da babakerensu a fannin samun bayanai, daga baya su sayar wa kasashe masu tasowa hidimomin AI bisa farashi mai tsada.
Kana, kalaman wani malami mai ziyara a jami’ar ACU ta Ghana, Emmanuel Gadasu, sun kara tabbatar da babakeren da kasashen yamma ke yi wa kasashe masu tasowa a bangaren dijital. Ya nuna cewa, kasashe masu tasowa sun ba da gudunmawa mai yawa na tattara bayanan horo don tabbatar da ci gaban fasahar AI, amma ba su sami daidaitaccen kudin shiga ko fasaha bisa ayyukan da suka yi ba, kuma an kwashe bayanansu kyauta, matakin da ya kara fadada gibin ci gaban dijital tsakanin kasashe masu wadata da kasashe masu tasowa.
A hannu guda kuwa, Sin ta bi wata hanya ta daban. Farashin bincike da amfani da samfuran fasahar AI na kasar Sin kamar DeepSeek ya kai kashi 5 zuwa 10 cikin 100 bisa na kasashen yamma. Wannan tsarin hadin gwiwar AI na bude kofa mai rahusa kuma mai saukin amfani ya ba da dama ga kasashe masu tasowa, musamman kasashen Afirka, da su ci gajiyar fa’idodin damammakin fasahar Sin cikin sauri, alal misali yawan saukar da manyan samfuran AI da Sin ta samar ba tare da shingaye ba a duniya ya wuce sau biliyan 10, wanda ya taimaka wa kasashe masu tasowa su yi amfani da sabbin fasahohi da kayayyaki.
A Kigali, babban birnin Rwanda, masu kirkire-kirkire na fasahar hada-hadar kudi sun fara amfani da tsarin AI na kyauta irin na Sin don horar da samfuran AI na gida. Sa’an nan a birnin Legas na Najeriya, sabbin kamfanonin fasahar noma suna amfani da nau’ikan samfuran AI na kyauta don kirkirar kayan aikin gano cututtukan abubuwan da aka shuka irinsa rogo. Ban da haka, a jami’ar Zimbabwe, cibiyar manyan kwamfutoci na mataki na biyu da Sin ta taimaka wajen ginawa ta fara aiki, kuma karfin lissafinta yana kan gaba a nahiyar Afirka. Tabbas, kasashen Afirka za su iya dogaro da fasahar Sin ta kyauta don bunkasa karfinsu na kirkire-kirkire.
Bambancin tsare-tsaren biyu, ya wuce maganar fasaha. A hannu guda, kwararru dake Silicon Valley na kasar Amurka suna kallon AI a matsayin “kayan aikin wayewar kai”, suna gina shingaye bisa tsarin fasaharsu, da mallake fasaha; a hannu guda kuma, Sin ta mai da fasahar AI a matsayin mai samar da fa’ida ga dukkan bil’adama, tare da samar da fasahohi kyauta, ta yadda fasaha za ta amfanar da talakawa a ko ina. Shugaba Xi Jinping na kasar Sin ya taba bayyana cewa: ” Bai kamata ci gaban AI ya zama tamkar wasan kide-kide na wata kasa daya kadai ba, a’a, ya kamata ya zama wasan kide-kide na hadin gwiwar duniya.” Tabbas ne, hanyar hadin gwiwa ta samar da fasahohi kyauta ta Sin za ta kai ga samar da makoma mai adalci ta dijital a duniya nan gaba.(Marubuciya: MINA)
