An karrama masana ilimin lissafi na kasar Sin da suka hada da Deng Yu da Wang Hong da lambobin yabo na Fields Medal, yayin taron kasa da kasa kan ilimin lissafi da aka fara jiya Alhamis, wanda shi ne karo na farko da masana lissafi na kasar Sin suka samu wannan karramawar mai daraja.
Yayin bikin bude taro a cibiyar taro ta Pennsylvania da ke Amurka, kungiyar masana ilimin lissafi ta duniya ta sanar da Deng Yu a matsayin wanda ya samu lambar yabon a bangaren aikinsa na dabarar lissafin sauye-sauye a mabanbantan bangarori na Partial Differential Equations, yayin da Wang Hong ta samu lambar yabo a bangaren aikinta na lissafin yanayin siffofi da kididdigar sauti da motsi na Harmonic Analysis and Geometric Measure Theory.
Efim Zelmanov wanda ya taba samun lambar yabon ta Fields Medal ya shaidawa kafar yada labaru ta Xinhua cewa, “Masanan biyu Sinawa da aka karrama, sun kammala muhimman bangarorin karatunsu ne a kasar Sin.
Kuma gagarumar nasarar da suka samu alama ce mai karfi da ke nuna karfin tubalin Sin da karuwar rawar da take takawa a bangaren lissafi a duniya.” (Fa’iza Mustapha)
