Gwamnatin Tarayya ta fara biyan Naira biliyan 18 a matsayin hakkokin sallama ga tsofaffin ma’aikatan kamfanin jiragen sama na ƙasa, Nigeria Airways, shekaru 22 bayan rushe kamfanin. Jimillar ma’aikata 2,700 ne abin ya shafa.
Ma’aikatar Kuɗin Tarayya ta ce an kammala biyan ma’aikata 2,100 da ke cikin rukuni na farko zuwa na bakwai, yayin da ake kammala shirye-shiryen biyan sauran 600 da ke cikin rukuni na takwas da na tara, waɗanda ake sa ran za su karɓi hakkokinsu cikin kwanaki masu zuwa.
Shugaba Bola Ahmed Tinubu ne ya amince da biyan kuɗin, tare da umartar a kawo ƙarshen wannan batu da ya kwashe sama da shekaru 20 yana jiran warwarewa. Ma’aikatar Kuɗi ta ce ta gudanar da tantance bayanan waɗanda suka cancanta, da tabbatar da bayanan su kafin biyan kuɗin.
Ministan Kuɗi kuma Ministan da ke kula da tattalin arzikin ƙasa, Taiwo Oyedele, ya ce biyan kuɗin ya nuna ƙudurin gwamnati na biyan halastattun basussukan da mutane ke bin ta. Ya ce an yi amfani da tantancewar bayanan ɗan Adam, da bayanan banki da sauran matakai domin tabbatar da cewa kuɗin sun isa ga waɗanda suka cancanta.
Ma’aikatar ta kuma ce za ta gudanar da wani sabon zagaye na tantancewa domin gano tsofaffin ma’aikatan da ba a samu damar kammala bayanansu ba. Ana sa ran wannan aikin zai fara daga ƙarshen Satumba ko farkon Oktoba, kuma zai haɗa da gyara bayanan banki da kuma tantance magadan ma’aikatan da suka rasu.
