Mataimakin Shugaban Ƙasa, Sanata Kashim Shettima, ya karɓi wani babban tsohon jagoran jam’iyyar ADC na Jihar Katsina, wanda ya fice daga jam’iyyar adawar tare da komawa jam’iyya mai mulki ta APC.
Yayin da yake maraba da sabon ɗan jam’iyyar a Fadar Shugaban Ƙasa da ke Abuja, Shettima ya bayyana cewa ƙofar jam’iyyar APC a buɗe take a kowane lokaci domin karɓar tsofaffin ƴan jam’iyya da sabbin mutane masu kishin ƙasa, waɗanda ke da burin ba da gudunmawa wajen gina ƙasa ƙarƙashin manufofin gwamnatin Shugaba Bola Ahmed Tinubu.
A nasa ɓangaren, tsohon jagoran na ADC ya bayyana dalilinsa na komawa jam’iyyar APC, inda ya kafa hujja da gamsuwa da ƙoƙarin da gwamnatin tarayya da kuma gwamnatin Jihar Katsina ke yi wajen tunkarar ƙalubalen tsaro da raya ababen more rayuwa, yana mai alƙawarin yin aiki tare da sauran shugabannin jam’iyyar domin tabbatar da haɗin kai.
Mataimakin Shugaban Ƙasar ya buƙaci sabon ɗan jam’iyyar da ɗaukacin magoya bayansa da su maida hankali wajen wayar da kan al’umma da ƙarfafa jam’iyyar a matakin ƙasa-da-ƙasa a Katsina, tare da jaddada cewa haɗin kan ƴan jam’iyya shi ne ginshiƙin samun nasara a dukkan harkokin siyasa da ci gaban yankin baki ɗaya.
