A cikin makonni takwas da suka gabata, fasahar kirkirarriyar basira (AI) ta kasar Sin ta nuna wani kyakkyawan kuzari na samun nasarori tare da samun ci gaba a fannoni daban-daban. Wannan wani babban tsari ne a fili game da salon “kirkire-kirkire da za a iya fadadawa” na kasar Sin inda kirkire-kirkire ba wai kawai za su zamo samun nasara ne a fanni daya tak ba, a’a, amma kafa wani tsari ne na gaba daya mai karfi wanda za a iya sake maimaitawa, da fadadawa, da kuma kimtsa wa amfani da shi a aikace a zahiri.
A yau, salon “kirkire-kirkire da za a iya fadadawa” ya zama babban ginshiki da ke jan hankali a fannin sauye-sauyen masana’antu na duniya. Ana matukar yarda da cewa kasar Sin, ta hanyar amfani da babbar kasuwarta mai matukar fadi, da cikakken tsarin masana’antunta, da ingantaccen tsarin aiwatar da binciken kimiyya a aikace, da kuma tsarin alaka mai bude kofa, ta samar wa duniya da muhimman darussa da fahimta a kan wannan babban buri.Duk da haka, ganin yadda kasar Sin ta samu babban ci gaba a fannin kirkire-kirkire, wasu kasashen yamma sun shiga yanayi na firgici.
Musamman ma wannan ya fi fitowa fili tun daga farkon wannan shekara, inda Amurka ta rika amfani da batun tsaron kasa fiye da kima, sannan a karkashin hujjar kare hakkin mallakar fasaha da tsaron shafin intanet, wajen ci gaba da danniya da dakile kayayyakin manyan fasahohi na zamani na kasar Sin.Sai dai kuma, gaskiyar lamarin ya tabbatar da cewa shirin “Damammakin Sin samfurin 2.0” ya zama babbar matsaya da al’ummomin kasa da kasa suka amince da ita.
Kafar yada labarai ta kasar Koriya ta Kudu mai suna Asia News ta ruwaito kwanan nan cewa, babban karfin masana’antu da Sin take da shi, da sabbin nasarorin kirkire-kirkiren fasaha da take samu a-kai-a-kai, da kuma ci gaba da fadada bude kofarta ga duniya, ba wai kawai suna habaka sauye-sauye da daga darajar tattalin arzikinta ba ne, har ma suna samar da sabon sarari ga ci gaban duniya da kuma kulla hadin gwiwa.
Abin da kuma ya fi dacewa a yaba shi ne, a yayin da ake tsaka da samun karuwar gitta shingayen kasuwanci, kasar Sin ta dukufa ga bude kofa da kuma tafiya tare da kowa da kowa, inda take hada hannu da sauran kasashe domin gina tsarin kirkire-kirkire mai samar da moriya ga kowa.Shin kirkire-kirkiren Sin sun haifar da firgici ne ga duniya ko kuwa damammaki? Hujjoji na gaskiya sun riga sun ba da amsar wannan tambaya.
“Kashe hasken fitilar wani ba ya sa taka fitilar ta fi haske.” Bata suna da danniya daga kasar Amurka da wasu kasashen yammacin duniya ba za su iya hana kasar Sin karfafa ci gaba mai inganci ta hanyar kirkire-kirkire, da kuma zurfafa samar da ci gaba na bai-daya ta hanyar bude kofa ba. (Abdulrazaq Yahuza Jere)
