An kaddamar da rukuni mafi girma na hadakar na’urori masu kwakwalwa a babbar cibiyar sadarwar na’urorin ta kasar Sin da ke Zhengzhou na lardin Henan da ke tsakiyar kasar.
Babban rukunin gidajen rediyo da talabijin na kasar Sin CMG, ya ruwaito cewa, wannan wata muhimmiyar nasara ce ga tsarin kayayyakin na’urori masu kwakwalwa da ke ingiza binciken kimiyya a bangaren kirkirarriyar basira ta AI, lamarin da zai taimaka wa kasar Sin samun babbar damar wajen amfani da AI a tsarin ayyukan masana’antu.
Babbar cibiyar na’urorin ta fara aikin gwaji ne a ranar 5 ga watan Fabrairu da naurorin chip masu gaggauta kirkiro manhajojin AI guda 30,000 da aka samar a cikin gida.
Zuwa jiya Talata kuma, adadin wadannan na’urorin chip ya karu zuwa 60,000.Wannan babbar cibiya ta samar da wani hadadden tsarin da aka samar a cikin gida mai hade da bayanai da karfin sarrafa su da tsare-tsare da manhajoji.
Haka kuma, ta hada rukunonin bayanai da kayayyaki da dubban tsare tsaren AI da za a iya amfani da su, wanda ke bayar da amfani da bunaksa su cikin sauri. (Mai fassara: Fa’iza Mustapha)
