Dakarun Operation FANSAN YAMMA a Arewa maso Yamma sun ceto mutane 23 da aka yi garkuwa da su tare da kama mutum huɗu da ake zargin mambobin ƙungiyar Lakurawa ne a wasu sumame daban-daban a Jihar Sakkwato. An gudanar da ayyukan ne ranar Lahadi, 20 ga Satumba, 2026, a ƙananan hukumomin Wurno, Sabon Birni, Isa da Illela.
Jami’an sojin sun ce sun mayar da martani kan harin da ’yan ta’addan suka kai Sabon Gari, cikin Ƙaramar Hukumar Wurno, inda suka buɗe wa mazauna garin wuta. Sojojin sun fatattaki maharan, tare da ceto mutane shida da aka yi garkuwa da su. Wani farar hula da harsashi ya ji wa rauni a yayin harin shi ma an kai shi asibiti domin samun kulawar lafiya.
A wani sumame da aka kai kan hanyar Sabon Birni zuwa Takatsaba, musamman yankin Chabe Biyu, sojojin sun yi kwanton-bauna bisa bayanan sirri kan yunƙurin ’yan ta’addan ratsa yankin. Bayan ganinsu, sojojin sun buɗe musu wuta, lamarin da ya tilasta musu tserewa. Haka kuma, bayan samun kiran neman agaji a hanyar Isa zuwa Kwanar Isa zuwa Shinkafi, sojojin sun fafata da maharan tare da tilasta musu ja da baya, inda binciken da aka gudanar daga bisani ya kai ga ceto mutane 17 da aka yi garkuwa da su.
A Ƙaramar Hukumar Illela kuma, sojojin sun kama mutum huɗu da ake zargin mambobin Lakurawa ne bayan samun bayanan sirri cewa suna ƙoƙarin kwashe wasu shanu da ake zargin an sace daga ƙauyen Sarma zuwa Illela. An kuma kwato shanu shida, yayin da ake tsare da waɗanda ake zargin domin ci gaba da bincike. Rundunar ta ce tana ci gaba da ƙoƙarin cafke sauran waɗanda suka tsere.
