Rundunar Sojin Nijeriya ta samu babban nasara a yaƙin da take yi da ta’addanci, bayan da dakarunta na “Operation Hadarin Daji” suka cafke wani mutum da ake zargi da samar wa ƴan ta’adda kayan aiki a Jihar Zamfara. Wannan babban kamu ya auku ne sakamakon sahihan bayanan sirri da sojojin suka samu, wanda ya kai ga tare mutumin tare da kwace muhimman kayayyaki da akai nufin kai wa sansanonin ‘yan bindiga.
Yayin gudanar da bincike na tsanaki a kan motar wanda ake zargin, dakarun sojin sun gano takalman jami’an tsaro (combat boots) guda 150 sababbi fil, waɗanda aka ɓoye da nufin kai wa mambobin ƙungiyoyin ‘yan ta’addan da ke addabar yankin. Haka zalika, an gano kuɗi da wasu kayayyakin masarufi waɗanda duka ke tallafa wa ayyukan ta’addanci a fadin jihar.
Rundunar sojin ta jaddada cewa kama wannan dillali zai taimaka ƙwarai wajen gano sauran mambobin dake taimaka wa ‘yan ta’adda da bayanai da kayan yaki.
Gwamnati ta yaba da jajircewar dakarun, inda ta yi kira ga al’ummar Jihar Zamfara da su ci gaba da ba da haɗin kai ta hanyar samar da sahihan bayanai a kan duk wani motsi na shakku. A halin yanzu, ana ci gaba da gudanar da bincike a kan wanda aka kama ɗin domin miƙa shi ga gaban kuliya domin fuskantar hukunci.
