Sojojin Nijeriya ƙarƙashin rundunar Operation Fansan Yamma sun kuɓutar da mutane 11 da aka yi garkuwa da su a wasu hare-hare biyu da suka gudanar a Ƙaramar Hukumar Danko-Wasagu ta Jihar Kebbi. An gudanar da ayyukan ne tsakanin ranakun 30 da 31 ga Oktoba, 2026, bayan samun rahotannin hare-haren ƴan bindiga a yankin.
Kakakin rundunar sojojin, Laftanar Kanal Osoba Olaniyi, ya bayyana cewa aikin farko ya biyo bayan kiran gaggawa kan wasu mahara da suka tare hanyar zuwa garin Ribah, tare da ƙoƙarin shiga cikin garin. Sojojin da aka tura yankin sun gano cewa an yi garkuwa da wasu mazauna yankin, yayin da aka ga wasu babura da aka bari a wurin.
Ya ce dakarun sun bi sawun maharan, inda aka yi musayar wuta da su, lamarin da ya tilasta musu tserewa tare da barin mutum bakwai da suka yi garkuwa da su. An bayyana sunayen waɗanda aka kuɓutar da su da Sa’adu Bala, Dantani Yahyi, da Nura Musa, da Nasiru Muhammad, da Abdulakeem Abubakar, da Abdulahi Maikudi da Zaki Gom. Rundunar ta ce an mayar da su ga iyalansu.
A wani sumamen na daban a yankin Wasagu, sojojin da ke sintiri sun fuskanci harin wasu da ake zargin ƴan ta’adda ne. Dakarun sun mayar da martani tare da fatattakar maharan, waɗanda suka gudu suka bar mutum huɗu da aka yi garkuwa da su a gonakinsu a ƙauyen Wasagu. Waɗanda aka kuɓutar su ne Lawali Ali, Samaila Shuaibu, Kasimu Shuaibu da Aliyu Bala, waɗanda daga bisani aka miƙa wa shugaban al’ummar yankin.
Rundunar sojojin ta ce za ta ci gaba da gudanar da ayyukan yaƙi da ƴan bindiga da sauran masu aikata laifuka domin kare rayuka da dukiyoyin al’umma. Ta kuma tabbatar wa mazauna yankin cewa za ta ci gaba da mayar da martani cikin gaggawa kan duk wata barazanar tsaro.
