Muhawararmu ta wannan makon, an tattauna ta ne kai tsaye da masu karatu, kan shin tsakanin yanayin sanyi da na zafi, wanne ka fi so ko kuma ya fi maka dadi? Kamar kowane lokaci, SANI ANWAR da MUHAMMAD BAKIR, su ne suka tattaro ra’ayoyin naku.
Bature Umar, Jihar Kano
Batu na gaskiya, na fi son yanayin sanyi. Dalili kuwa, a lokacin sanyi, an fi lafiya, cututtuka da dama neman su ake a rasa duk sun kama gabansu. Musamman ma mu a Nijeriya, ba mu da cutar da ta fi ta Maleriya, sakamakon yawan Sauron da muke da shi, wanda a lokacin sanyi, mafi yawan Sauro mutuwa yake yi.
Matsalar kawai ta ce, a lokacin sanyi a kan takura, mutane su kasa sakewa, ko wanka ma sai mutum ya yi da gaske zai iya yi. Amma duk da haka, lokacin sanyin ya fi na zafi dadin sha’ani.
Ibrahim Ahmed Ibrahim, Zaria
Kai wallahi sanyi ya fi min dadi sosai. Da sanyi ina iya koyarwa lafiya, ba tare da gumi ya jika rigata ba. Dalibai ma suna kula da karatu yadda ya kamata, amma da zafi kuwa, aji yana yin zafi, fanka ba ta isa, kowa yana share gumi.
Haka nan, ko da daddare ma a lokacin sanyi, bacci ya fi dadi sosai, mutum zai iya rufe jikinsa da bargo ya yi bacci mai nauyi.
Halima Elukpo
Na fi son yanayin sanyi, domin kuwa na fi samun lafiya da nutsuwa yadda ya kamata. Duk lokacin da na zo yin bacci, rufa nake yi na yi kwanciyata, har gari ya waye ba ni da wata matsala. Amma a lokacin zafi kuwa, musamman idan babu wuta, baki-daya bacci gagara yake yi, sai dai mutum ya yi ta faman juyi.
Haka zalika, a lokacin zafi kwata-kwata ma bacci bai cika yin dadi ba, ko da kuwa akwai wuta. Sannan, duk ‘yan kananan cututtuka, sun fi tashi a lokacin zafi, musamman cutar Maleriya sakamakon cizon sauro.
Kueen Merry Onokome
Na fi son lokacin sanyi, saboda ya fi saukin samun dumi fiye da yadda yake da saukin rage zafi. Bugu da kari, mutane suna samun kuzari da kuma yin ayyuka yadda ya kamata a lokacin sanyi.
Ina son sanya rigunan sanyi masu dadin jin dumi da cin abinci mai zafi da kuma samun barci mai dadi yayin da ake jin sautin ruwan sama ko kuma rungume juna a cikin bargo.
Haka kuma, lokacin sanyi yana sa lokacin rana ya wuce da sauri, ma’ana, lokaci ya fi saurin tafiya.
Abdulmudallib Ibrahim Bature, Baure Katsina
Ni na fi son lokacin bazara, wato lokacin zafi Kenan, domin kuwa ko a lokacin idan mutum ya lura saboda yadda ni’imar take, ai ko itatuwa ma lokacin suke yin sabon tofo ko sabbin ganyaye. Don haka, ni ma a lokacin ne na fi jin dadin jikina, kuma na fi yin sheki da haske.
A wannan lokacin, ina yin wanka a duk lokacin da nake so, sabanin lokacin sanyi wanda ni ma ko da wasa ba zan iya fara yin haka ba.
Buhari Abdullahi, Jihar Kaduna
Na fi jin dadin yanayin zafi. Da farko, zafi da hasken rana suna taimakawa wajen busar da tufafi da abinci.
Na biyu, tsirrai (plant) suna amfani da hasken rana wajen yin ‘photosynthesis’, wanda ke taimaka musu wajen samar da abincinsu. Na uku, yanayin zafi yana saukaka ayyuka da dama na waje, kamar noma da wasanni.
Saboda haka, a tunanina da nawa ra’ayin, yanayin zafi yana da matukar amfani ga rayuwa idan ana amfani da shi cikin daidaituwa yadda ya kamata.
Sannan kuma baya ga haka, yana kara nuna muhimmancin tsafta ko kuma a ce tsaftar jiki, muhalli da wajen kwana. Lokacin zafi, yana da matukar wahala, sai ka ga mutum bai yi wanka ba ko gyaran daki, ko kuma muhalli baki-daya, saboda kwayoyin halittu (enzymes), suna saurin yaduwa a jiki da kuma sauran al’umma baki-daya.
Ahmad Bello, Jihar Kaduna
Ni a gare ni, yanayin sanyi ya fi dadi sosai. Saboda a lokacin sanyi, mutum ya kan zauna cikin yanayin nutsuwa, wanda ba kasafai yake samu a lokacin zafi ba. A lokacin sanyi, na kan fi jin dadin karatu, saboda babu takura ta rashin iska sosai. Haka kuma, na kan samu damar yin tunani cikin nutsuwa ba tare da jin wata wahala ba.
Ban cika son lokacin zafi ba, saboda rana ta kan yi zafi sosai a wannan lokacin. Hakan yana sa mutum ya ji gajiya sosai da rashin kuzarin yin aiki. Saboda haka, idan aka ba ni zabi tsakanin yanayin sanyi da na zafi, zan zaɓi yanayin sanyi.
Zakari Ya’u Hashim, Mando Kaduna
Magana ta gaskiya, na fi son yanayin sanyi, wanda kuma ba irin na damina ba. Domin a lokacin sanyi, na fi jin dadin jikina tare da samun walwala, amma a lokacin zafi (Bazara), sam ba na samun cikakkiyar walwala da jin dadi, duk sai jikina ya daddaure. Shi yasa ma idan an shiga wannan lokaci na zafi, har kosawa nake yi, ina yin Allah-Allah ya fita.
