A ranar 30 ga watan Disamban 2025, mota mai amfani da lantarki kirar kamfanin Tesla, ta miliyan 9 ta bar layin kera motoci na babbar masana’antar kamfanin dake birnin Shanghai na Sin.
Shekaru bakwai da suka gabata, wato a watan Janairun 2019, a wani yanki mai laka dake Lingang a Shanghai, Elon Musk ya danna madanin kaddamar da aikin masana’antar Tesla ta Sin, inda daga bisani aka cimma nasarar abin da ake ganin kamar “Ba Zai Yiwu Ba” a sauran wurare dake duniya. Daga aza tubali zuwa samar da kayayyaki, an aiwatar da dukkan matakan ne cikin kusan watanni 10. Ta wannan hanya, aka samar da wani abun al’ajabi, wato “Kammala aikin gini, da fara samar da kaya, da kuma mika sabuwar masana’antar da aka gina, duk a cikin shekara daya kacal”.
Mista Musk ya bayyana cewa, wannan “saurin bunkasa na Tesla” dake da matsayi na musamman a tarihin masana’antu na duniya, ya dogara ne ga ingantaccen tsarin doka da ingancin salon gudanarwa na Sin.”
Ana iya ganin cewa, wannan masana’anta ta Tesla, wadda Musk ya kira da “masan’antar cikar mafarki”, ba wai kawai nasara ce ga kamfani daya ba, har ma shaida ce kan yadda Sin ke inganta yanayin kasuwancinta, ta hanyar kyautata tsarin doka, da amfani da matakin bude kofa wajen jawo hankalin kamfanonin duniya. Hakan ya nuna tabbaci da dorewar yanayin kasuwancin Sin. (Safiyah Ma)
Discussion about this post