Daya daga cikin Shahararrun Marubutan fina-finan Hausa, kana matashi mai shiryawa wanda ya shafe shekaru goma cikin masana’antar Kannywood wato ABBA ABUBAKAR MUHAMMAD Wanda aka fi sani da ABBA HARARA ya bayyana dalilinsa na maida hankali ga shirya fin nasa na kansa, har ma da wasu batutuwan da suka shafi sana’arsa ta fim. Ga dai tattaunawar tare da Wakiliyarmu RABI’AT SIDI BALA kamar haka:
Ya sunan Malamin?
Sunana Abba Abubakar Muhammad amma an fi sanina da Abba Harara.
Ko za ka fada wa masu karatu dan takaitaccen tarihinka?
Toh an haifeni A Garin Kano Unguwar Gama ‘Brigade’ nayi ‘Primary’ da ‘Secondry’ A Suntulma Dake Unguwar Gama, na tsaya iya ‘Secondry’ ban ci gaba ba sai kuma Allah ya kawo ni masana’antar Kannywood.
Cikin sunanka na ji an hada da Harara, A ina ka samo sunan Abbah Harara?
Na samu sunan a wajen Aisha Aliyu Tsamiya, ba na mantawa ita ce ta saka min kuma cikin ikon Allah ya bini.
Wanne rawa kake takawa a cikin masana’antar Kannywood?
Ina taka rawa guda 2 a cikin masana’antar Kannywood. Na 1 ni Marubuci ne, na 2 kuma ni mai shiryawa ne wato ‘Producer’.
Me ya ja hankalinka har ka tsunduma cikin masana’antar Kannywood?
Tun ina yaro harkar fim take birge ni kwarai da gaske.
Ya gwagwarmayar shiga masana’antar ta kasance?
Abin dai kam sai godiya duk da gaskiya ni ban sha wuya wajen shiga ba.
Za ka yi kamar shekara nawa cikin masana’antar?
Zan yi kamar shekara 10.
Ga ka marubuci kuma mai shiryawa, toh tun a farkon da ka fara rubutun kana shirya fim ne ko kuwa iya rubutun kake daga baya kuma ka dora da shiryawa?
Tun farko ni marubuci ne ban taba tunanin ma zan kasance daga cikin masu shirya fina-finai ba, Amma cikin ikon Allah sai na samu kaina a wannan bangaren.
Taya za ka yi wa masu karatu bayanin yadda aka yi har ka fara shirya fim?
Akwai lokacin da za ki ga wasu daga cikin mutanenmu basa daukar labarinka yadda ka tsara shi to wannan yana kashe martabar labari shi ne kawai abin da ya bani kwarin gwiwar nima na soma shirya nawa da kaina.
Farkon da za ka fara shirya fim naka na kanka shin ka nemi taimakon wani ko kuwa kai tsaye ka fara?
A’a! Ban nemi taimakon kowa ba.
Ko akwai wani dan kalubale da ka fuskanta a lokacin, ganin cewar shi ne farkon farawar ka, musamman yadda za ka harhado kan su Jaruman da kake son su taka rawa cikin fim din?
Toh! kin san ba a rasa matsala a yayin farkon somawa amma Alhamdulillah gaskiya sai godiya kawai.
Mu koma batun rubutu, lokacin da za ka fara ka nemi taimakon wani ne ko kuwa da kanka ka zauna ka fara rubutawa?
Gaskiya akwai wanda ya shige min gaba a harkar rubutu shi ne ma ya koya min yadda ake rubutun labarin fim ba na taba mantawa, Sunanshi Sani Ata.
Wanne fim ka fara rubutawa kuma wanne ka fara shiryawa ?
Fim din da na soma rubutawa shi ne Ranar Suna, wanda na soma shiryawa kuma shi ne Malamin Kauna.
Kamar wadanne Jarumai ne suka fito cikin fim din?
Ali Rabi u Ali Daddy da Aisha Aliyu Tsamiya da Tanimu Akawu da Isyaku Jalingo.
Nawa ne adadin fina-finan da ka rubuta da kuma wanda ka shirya?
Wanda na rubuta ba za su wuce 50 ba wanda kuma na shirya ba za su wuce 5 ba.
Wanne abu ne ya fara baka wahala lokacin da za ka fara rubutu da kuma lokacin da ka fara kokarin shirya fim da kanka?
Toh gaskiya lokacin da zan rubutu na kan kwana na wuni ban iya rubuta komai ba saboda duk abin da ya kasance nazari ne to yana bukatar dogon tunani. Haka da na soma kokarin shirya fim na kaina na sha wahala saboda abu ne wanda ba ka taba yi ba sai kuma ka zo za ka yi to za ka fuskanci abubuwa da dama.
Toh ya batun dawowar kudaden da aka kashe, musamman bangaren shirya fim din?
A gaskiya kudi basa dawo wa a harkar fim kawai muna yi ne saboda sabo kuma kawa zuci saboda harkar fim tana da shiga rai.
Kamar yanzu da fim ya koma kan ‘You tube’ ake Siris fim ya kuke iya fidda kudadenku har kuke biyan sauran Jaruman da za su fito cikin fim din, ko kuwa yanzu ba biya ake yi ba kawai ana yi ne ya fi ba a yi ko kuwa?
Dole za ka biya Jarumi sannan idan ‘YouTube’ din ka ya kai wani mataki za a soma biyanka duk da hakan baya dawo da kudin da ka kashe sai dai ka dan samu abin da ka samu kawai.
Kamar shi rubutun fim din, idan kuka rubuta siyar wa kuke yi ga masu shiryawa, ko kuwa kyauta kuke bayar wa ganin ku ne marubutan duk kuna tare?
Siyar wa muke yi ko kuma furodusa ya ce ka yi masa rubutu ya biya ka ba kyauta bane.
A cikin naka rubutun fim din wanne ne ka siyar da shi da tsoka wanda ba za ka taba mantawa ba
Akwai wani sunansa ATM.
Ko za ka iya fado wa masu karatu sunayen fina-finan da ka rubuta ko da kadan ne?
Akwai Fauwaz, Farida Nabil, Sirrin Zuciya, Bani da laifi, Makullin Zuciya, Maraicin ‘Ya Mace, Ruhin Mijina, Sadeek Sanam, da dai sauransu.
Za mu ci gaba mako me zuwa
