Shahararren ɗan wasan gaba na ƙungiyar ƙwallon ƙafa ta Real Madrid, Vinicius Junior, ya buƙaci takwaransa na Barcelona, Lamine Yamal, a kan ya ci gaba da tsayuwa wajen yaƙi da matsalar nuna wariya, bayan da ɗan wasan na Sifaniya ya fuskanci matsalar a ƙarshen watan da ya gabata.
A hirarsa da manema labarai a ranar Litinin gabanin wasan da Real Madrid ta yi da Bayern Munich a gasar Zakarun Turai, Ɓinicius ya yi fatan Yamal zai ci gaba da yaƙar wannan matsalar da mutane da dama ke fuskanta kuma ya ce yana da tabbacin ɗanwasan zai samu nasara idan ya tsaya sosai ya yaƙi masu furta kalaman wariya.
- Ƙarin Farashin Man Fetur: TUC Ta Shawarci Gwamnati Ta Tallafawa Matatun Mai Na Cikin Gida
- Bayern Munich Da Real Madrid: Ramuwar Gayya Ko Daukar Fansa
A cewa Vinicius, lamarin nuna wariya Al’amari ne mai rikitarwa, kuma yana yawan faruwa, inda ya bayyana fatansa ga Lamine zai ci gaba da wannan yaƙin domin abu ne wanda za a ci gaba da furtawa saboda haka shima dole ne ya ci gaba da jure duk abin da za a gaya masa domin nan gaba shi ne da nasara.
Idan dai ba ku manta ba, a yayin wasan sada zumunci da aka yi tsakanin Sifaniya da Masar da aka tashi babu ci a makon da ya gabata, Yamal ya fusata cin zarafi ta hanyar rera waƙoƙin nuna wariya daga magoya bayan tawagar ƙasar ta Sifaniya. Vinicius dai ya daɗe yana fuskantar matsalar nuna wariyar launin fata a Sifaniya, lamarin da ya sanya shi tashi tsaye wajen yaƙar wannan matsala.
Discussion about this post